وەزارەتی دەرەوەی ئەمریکا پشتیوانیی خۆی دەربڕی بۆ دەستپێکردنی گفتوگۆ لەنێوان حکوومەتی نوێی سووریا و هێزەکانی سووریای دیموکرات (هەسەدە)، بە ئامانجی تێکەڵکردنی هەسەدە بە پێکهاتەی وەزارەتی بەرگریی ئەو وڵاتە.
ڕۆژی چوارشەممە، 6ـی ئاب، تامی بروس، گوتەبێژی وەزارەتی دەرەوەی ئەمریکا، ڕایگەیاند: ''ویلایەتە یەکگرتووەکان پێشوازی لە هەر دیدارێکی بنیاتنەر دەکات لەنێوان ئەحمەد شەرع، سەرۆکی حکوومەتی کاتیی سووریا و مەزڵووم عەبدی سەرۆکی هێزەکانی سووریای دیموکرات''. ناوبراو دووپاتی کردەوە واشنتۆن ''پشتیوانی لە هەوڵەکانی هەسەدە دەکات بۆ گۆڕینی ئاگربەستی ئێستا لە باکووری ڕۆژهەڵاتی سووریا بۆ ئاشتییەکی گشتگیر و هەمیشەیی''.
تامی بروسی، ئاماژەی بە لێدوانەکانی تۆماس باراک، باڵیۆزی ئەمریکا لە تورکیا و نێردەی تایبەتی وڵاتەکەی بۆ سووریاش کرد، کە نیگەرانیی خۆی لەبارەی توندوتیژییەکانی ئەم دواییەی سوەیدا و منبج دەربڕیوە و جەختی کردووەتەوە کە ''دیپلۆماسی باشترین ڕێگایە بۆ کۆتاییهێنان بە توندوتیژی و بنیاتنانی چارەسەرێکی ئاشتییانەی هەمیشەیی".
بروس ئەوەشی خستە ڕوو کە ویلایەتە یەکگرتووەکان پێشتر ڕۆڵی نێوەندگیری لە چارەسەرکردنی قەیرانی سوەیدادا گێڕاوە و ئێستاش شانبەشانی فەرەنسا، هەوڵ دەدات بۆ دووبارە تێکەڵکردنەوەی ناوچەکانی باکووری ڕۆژهەڵات لە چوارچێوەی دەوڵەتی یەکگرتووی سووریادا.
کۆمێنت (0)
تا ئێستا هیچ کۆمێنتێک نەکراوە.