هاووڵاتییانی پارێزگاكانی ناوەڕاست و باشووری عێراق بەردەوام گلەییان لە خراپی شەقام و رێگەوبانی شارەكانیان هەیە، بۆ نموونە ئەمڕۆ سێشەممە داتای تەنیا 5 پارێزگا وەرگیراون كە بەهۆی رووداوەكانی هاتوچۆ لە ئەنجامی خراپی شەقام و رێگەوبانەكان، 27 كەس بوونەتە قوربانی.
میدیاكانی عێراق بڵاویان كردۆتەوە: ئەمڕۆ سێشەممە بەهۆی خراپی رێگەوبانەكان چەندین رووداوی گەورەی هاتوچۆ لە پارێزگاكانی بەغدا، دیالە، بابل، سەڵاحەدین و نەینەوا روویانداوە و تۆماركراون.
بڵاویشیان كردەوە: تەنیا لەو رووداوە گەورانەی كە لە بەڕێوەبەرایەتییەكانی هاتوچۆ و بنكەكانی تەندروستی تۆماركراون، تا دوای نیوەڕۆی ئەمڕۆ 27 كەس بوونەتە قوربانی.
هەروەها بڵاویان كردۆتەوە لەنێو قوربانییەكان ئافرەت و منداڵانیش هەن.
ئەمە لەكاتێكدایە كە لە ماوەی رابردوودا هاووڵاتییانی پارێزگاكانی ناوەڕاست و باشووری عێراق بەردەوام گلەییان لە خراپی رێگەوبان و خزمەتگوزارییەكان هەبوو و بۆ ئەم مەبەستەش چەندینجار ناڕەزایەتی و خۆپیشاندان ئەنجامدراون، بەڵام كێشەكان هەر بەردەوام بوونە و بگرە ساڵ بەساڵ خراپتر بوونە.
کۆمێنت (0)
تا ئێستا هیچ کۆمێنتێک نەکراوە.