کۆمیسیۆنی باڵای سەربەخۆی هەڵبژاردنەکانی عێراق لە بڕیارێکی نوێدا بەکارهێنانی مەرەکەبی دەنگدانی لە پرۆسەی هەڵبژاردنەکاندا بە تەواوی هەڵوەشاندەوە و ئیدارەی هەڵبژاردنیشی بۆ جێبەجێکردنی بڕیارەکە ڕاسپارد.
ئەمڕۆ یەکشەممە، 20ـی تەمووز، مەروان محەمەد، سەرۆکی لقی هەولێری کۆمیسیۆنی باڵای سەربەخۆی هەڵبژاردنەکانی عێراق بە دیجیتاڵمیدیای (کوردستان تیڤی) راگەیاند: بەهۆی ئەوەی بە رێکارێکی ناپێویست و زیادە زانراوە، کۆمیسیۆنی باڵای سەربەخۆی هەڵبژاردنەکان بڕیاری هەڵوەشاندنەوەی بەکارهێنانی مەرەکەبی دەنگدانی دەرکرد.
کۆمیسیۆن لە بەیاننامەیەکدا ڕایگەیاند: "ئەنجومەنی کۆمیسیاران، گفتوگۆی لەبارەی یاداشتی نووسینگەی سەرۆکی ئیدارەی هەڵبژاردن بە ژمارە (ر أ/ 1317) لە ڕێککەوتی 2025/7/8 کردووە کە سەبارەت بە بابەتی (مەرەکەبی هەڵبژاردن) بوو".
ئاماژەی بەوەش کردووە: "دوای گفتوگۆ و تاوتوێکردن لەنێوان ئەندامانیدا، ئەنجومەنی کۆمیسیاران بڕیاریدا بە هەڵوەشاندنەوەی بەکارهێنانی مەرەکەبی هەڵبژاردن، ئەمەش پاڵپشت بە لێکۆڵینەوەی هاوبەشی نێوان فەرمانگەی ئۆپەراسیۆنەکان و تەکنەلۆژیای زانیاری و بەشی گرێبەست و تەندەرەکان بە ژمارە (441) لە ڕێککەوتی 2025/7/7".
کۆمێنت (0)
تا ئێستا هیچ کۆمێنتێک نەکراوە.