ڕێگای هەولێر-سۆران لە ناو گەلی عەلی بەگ دادەخرێت

ئیدارەی سەربەخۆی سۆران لە ڕاگەیاندراوێکدا هاووڵاتییانی ئاگادار کردووەتەوە، بەشێک لە ڕێگای هەولێر-سۆران بە هۆی قیڕتاوکردنەوە دادەخرێت.

ڕۆژی سێشەممە 15ی تەمووزی 2025، ئیدارەی سەربەخۆی سۆران رایگەیاند " بۆ ماوەی یەک ڕۆژ واتا سبەی چوارشەممە 16/07/2025، بەهۆی قیڕتاوکردنی بەشێکی ڕێگای سۆران-خەلیفان لە ناو گەلی عەلی بەگ، ڕێڕەوی هاتن لە هەولێر بۆ سۆران لە کاتژمێر 7ی بەیانی تا کاتژمێر 10ی شەو بۆ هەموو جۆرە ئۆتۆمبێلێک دادەخرێت و هاووڵاتییان دەتوانن ڕێگای بێخال-ڕواندز-سۆران بەکاربێنن.

ئیدارەی سەربەخۆی سۆران ڕاشیگەیاندووە ڕێڕەوی چوون لە سۆران بۆ هەولێر، تەنها بۆ ئۆتۆمبێلی بچووک کراوە دەبێت و بارهەڵگرەکان دەتوانن ڕێگای سۆران-ڕواندز-بێخاڵ بەکاربێنن.

داواشی لە هاموشۆکارانی ئەم ڕێگایە کردووە، هاوکاری تیمەکانی بەڕێوەبەرایەتیی چاککردنەوەو پاراستنی رێگاوبانی سۆران و تیمەکانی پۆلیسی هاتووچۆی سۆران بکەن.