راگەیێندراوێک لە بارەگای بارزانی بۆ ڕای گشتی

دوای گفتوگۆی چڕی ئه‌مڕۆی مه‌كته‌بی سیاسی پارتی دیموكراتی كوردستان له‌سه‌ر دۆخی مووچه‌ی خه‌ڵكی كوردستان و هه‌ڵوێست و به‌رچاوروونییه‌كان به‌رامبه‌ر به‌غدا، باره‌گای بارزانی روونكردنه‌وه‌یه‌كی بڵاوكردووه‌ته‌وه‌ و ده‌ڵێت، به‌ڵێن دراوه‌ له‌م هه‌فته‌یه‌دا كێشه‌ی مووچه‌ چاره‌سه‌ر بكرێت. ئه‌مه‌ش ده‌قی روونكردنه‌وه‌كه‌یه‌..

بەناوی خودای مەزن و دلۆڤان

پەیوەست بە کێشەکانی نێوان هەرێمی کوردستان و حکوومەتی عێراقی فیدڕاڵ، لەسەر یەکلاییکردنەوەی پرسی مووچە و بودجە و شاییستە داراییەکانی هەرێمی کوردستان ئەمڕۆ مەکتەبی سیاسیی پارتی بۆ وەرگرتنی هەڵوێستی پێویست کۆبوویەوە.

هەر ئەمڕۆ د.فواد حوسێن دوای گفتوگۆ لەگەڵ لایەنە سیاسیەکانی عێراقی گەڕاوەتەوە کوردستان و بە مەكتەبی سیاسیی پارتی راگەیاندووە كە لایەن و کەسایەتییە سیاسییەکان و حكوومەتی عێڕاقی فیدراڵ بۆ چارەسەرکردنی ئەو کێشەیە بەڵێنی ئەوەیان داوە کە لە چەند رۆژی داهاتوودا پرسی ناردنی مووچە و شاییستە داراییەکانی هەرێمی كوردستان  چارەسەر بکرێت. 

هەر لەسەر داوا و بەڵێنی ئەوان و لەپێناو  بەردەوامبوونی گفتوگۆیەكی هێمنانە و ڕەچاوکردنی بارودۆخ و بەرژەوەندیی گشتی، پێمان باش بوو دوا دەرفەت بە حكوومەتی عێراقی فیدراڵ لە بەغدا بدەین بۆ ئەوەی ڕێگەیەک بۆ کۆتایهێنان بەم کێشەیە بدۆزنەوە، و هەمیشە بروامان بەوە هەبووە کە ئەگەر ڕێگەی گفتوگۆ هەبێت ئێمەش پێمان باشە بە لەیەکتر تێگەیشتن كێشەكان چارەسەر بكەین.