وەزارەتی تەندروستی هەرێمی کوردستان 20 رێنمایی بۆ رۆژانی جەژنی قوربان داوەتە بەڕێوەبەرایەتییەکانی تەندروستی هەر چوار پارێزگا و ئیدارە سەربەخۆکان و دەڵێت؛ "دەبێ تیمی تەندروستی لە شوێنە گەشتیارییەکان دابنریت بۆ پێشکەشکردنی خزمەتگوزاری تەندروستی بۆ باری لەناکاو".
رۆژی چوارشەممە 4ـی حوزەیرانی 2025، وەزارەتی تەندروستی هەرێمی کوردستان بڵاویکردووەتەوە؛ "لە پێناو بەرژەوەندی گشتی و بە مەبەستی پێشکێشکردنی خزمەتگوزاریی تەندروستی لە ڕۆژانی جەژنی قوربانی پیرۆز" بەڕێوەبەرایەتییەکانی تەندروستی هەرێمی کوردستان کاری پێویست بۆ جێبەجێکردنی رێنماییەکانیان ئەنجام بدەن.
رێنماییەکانی وەزارەتی تەندروستی 20 خاڵ لەخۆ دەگرێت و تیایدا تیشک خراوەتە سەر کردنەوەی دەرمانخانە و نۆرینگە و کۆگاکانی دەرمان و دووپات لەوە کراوەتەوە کە دەبێت؛ پزیشکانی پسپۆڕ و نیشتەجێی دێرین و خولاو و پەرستار و کارمەندانی تەندروستی بە دەوامی ئێشکگری پابەندبن.
هاوکات وەزارەتی تەندروستی فەرمانی کردووە؛ نەخۆشخانەکانی فریاکەوتن و نۆرینگە دەرەکیەکان کراوەبن و هەموو سەردان و زانیاریەکان تایبەت بە نەخۆش تۆمار بکەن و دەشڵێت؛ "دەبێت سەنتەرەکانی پێدانی چارەسەری کیمیاوی بۆ نەخۆشانی شێرپەنجە بە شێوەی ئێشکگری کراوەبێت".
لە رێنماییەکەدا وەزارەت داوا لە بەڕێوەبەرایەتییەکانی تەندروستی دەکات سەنتەرەکانی شوشتنی گورچیلە بە شێوەی ئێشکگری کراوەبن و تیمەکانی فریاگوزاری و هێلی 122 بەردەوام دەبن لە ئەرك و کارەکانیان بە شێوەی 24 کاتژمێری وە هۆبەی پزیشکی فریاکەوتن خشتەی دابینکردنی تیمەکانی دادەنێت بۆ شوێنەکانی پێویست و گەشتیاری.
وەزارەتی تەندروستی فەرمانی بەکردنەوەی بانکەکانی خوێن لە رۆژانی جەژن کردووە و دەشڵێت؛ "تیمەکانی تەندروستی بەهەماهەنگی تیمەکانی ڤێتەنەری چاودێری شوێنەکانی سەربڕینی ئاژەڵ بکەن و چاودێری مەرجە تەندروستیەکان بکەن".
لە کۆتاییدا وەزارەتی تەندروستی ئاماژە بە بەردەوامیی پێشکەشکردنی خزمەتگوزاری تەندروستی بۆ ئاوارەکان لە کەمپەکان دەکات لە رۆژانی جەژندا و رایدەگەیەنێت؛ "دەبێت تیمی تەندروستی لە شوێنە گەشتیارییەکان دابنریت بۆ پێشکەشکردنی خزمەتگوزاری تەندروستی بۆ باری لەناکاو".
کۆمێنت (0)
تا ئێستا هیچ کۆمێنتێک نەکراوە.