بە هەوڵی فەرمانگەی پەیوەندییەکانی دەرەوەی حكوومەتی هەرێمی كوردستان، سێ هاووڵاتی کە ببوونە قوربانی ئەو باندانەی بازرگانی بەمرۆڤەوە دەکەن، لە مالیزیاوە دەگەڕێنرێنەوە هەرێمی كوردستان.
فەرمانگەی پەیوەندییەكانی دەرەوە رایگەیاند: لە ماوەی چەند ڕۆژی ڕابردوودا لە ڕێگەی گرتەیەکی ڤیدیۆیی، سێ هاووڵاتی هەرێمی کوردستان کە ببوونە قوربانی ئەو باندانەی بازرگانی بە مرۆڤەوە دەکەن و هانایان بۆ فەرمانگەی پەیوەندییەکانی دەرەوە هێنا کە لەوێ فێڵیان لێ کراوە و گیریان خواردووە و بێ پارە و پاسپۆرت و شوێن ماون و لە دۆخێکی زۆر سەختدان.
راشیگەیاند: ئەم سێ هاووڵاتییە لەلایەن باندێک هەڵخەڵەتێنرابوون گوایە لە ڕێگەی وڵاتی مالیزیاوە ڕەوانەی ئەوروپایان دەکەن، بەڵام دواتر دەرکەوتووە بەڵگەنامەکان ساختەن و لە فڕۆکەخانە گیریان خواردبوو.
فەرمانگەی پەیوەندییەکانی دەرەوە هەروەها رایگەیاند: هەرزوو بەدواداچوونمان بۆ کێشەی ئەم سێ هاووڵاتییە کرد و لە ڕێگەی دامەزراوە فەرمییەکانی ئەو وڵاتە و هەڵسوڕێنەری کاروباری باڵیۆزخانەی عیراق لە مالیزیا توانیمان سۆرخیان بکەین و پاسپۆرتی گەڕانەوەیان بۆ دەستەبەر بکەین.
جەختیشی كردەوە كە ئێستا یەکێك لە هاووڵاتییەكان گەیشتووەتەوە هەرێمی کوردستان و دوو هاووڵاتییەکەی دیكەش کارەکانیان تەواو بووە و لە دەرفەتێکی نزیکدا ئەوانیش ڕەوانەی هەرێمی کوردستان دەکرێنەوە.
کۆمێنت (0)
تا ئێستا هیچ کۆمێنتێک نەکراوە.