ئه‌مڕۆ شه‌ممه 4ی نیسانی 2025 فازڵ میرانی بەرپرسی دەستەی كارگێڕیی مەكتەبی سیاسیی پارتی دیموكراتی كوردستان، لە كاتی مه‌راسیمی كردنەوەی بارەگای مەكتەبی ڕێكخستنی (كەركووك- گەرمیان)ی پارتی لە گۆنگرەیەكی رۆژنامەوانیدا بۆ میدیاكان رایگەیاند، ئەوانەی ئەمڕۆ له گۆڕه‌پانی سیاسی عێراق خۆیان بە بەهێز پیشان ده‌ده‌ن به‌هۆی خاڵی لاوازی كورد بووه ، ئەگەرنا ئەوەندە بەهێز نەبوونە كە نكۆڵی لە دەستوور و پێكەوەژیان له‌گه‌ڵ ئێمه‌دا بكەن، به‌ڵام كە خۆیان بەو شێوەیە دەبینن بۆیه تەحەكوم بە مووچە و دابەشكردنی خۆراكی هاووڵاتییان ده‌كه‌ن .
فازڵ میرانی ئه‌وه‌شی خسته‌ڕوو ، پارتی به كه‌ركووك نامۆ نیه‌و بیرباوەڕی كوردایەتی هەمیشە بیروباوەڕی پارتی دیموكراتی كوردستان بووه، بۆ هاتنەوەشمان بۆ كەركووك ئێمە هەر لە كەركووك بووینە و لە كەركووكیش دەبین .
فازڵ میرانی بەرپرسی دەستەی كارگێڕیی مەكتەبی سیاسیی پارتی دیموكراتی كوردستان ڕاشیگه‌یاند ، ئێمه له ناوه‌خۆ باسی چاڵاكی حیزبی ده‌كه‌ین ، به‌ڵام له ده‌ره‌وه باسی هۆشیاری نه‌ته‌وه‌یی و بیری نه‌ته‌وه‌یی ده‌كه‌ین ، شانازییه بۆ پارتی كه خۆی به پێشه‌نگی بیری نه‌ته‌وه‌یی و كوردایه‌تی ده‌زانێت و ڕۆژ به رۆژیش ئه‌و بیره له كه‌ركووك و ته‌واوی كوردستان به‌هێزتر ده‌بێت ، بۆیه ده‌بێت هه‌موو پارته سیاسییه كوردستانییه‌كان یه‌ك ده‌نگ و یه‌كڕیز بین له‌م دۆخه هه‌ستیاره‌دا .
فازڵ میرانی له دوماهی قسه‌كانیدا ئه‌وه‌شی ڕاگه‌یاند ،سەرۆك مەسعوود بارزانی و پارتی هەمیشە ئامانجیان پێكەوەژیان و برایەتی و پاراستنی مافی پێكهاتەكانی كەركووك بووە، بۆیه لە كاتی هێرشەكانی داعش، پێكهاتەكانی كەركووك داوایان لە سەرۆك مەسعوود بارزانی كرد پێشمەرگە كەركووك بپاریزێت، تا وەك مووسڵی لێ نەیەت .
کۆمێنت (0)
تا ئێستا هیچ کۆمێنتێک نەکراوە.