بەرەبەیانی ئەمڕۆ بە هۆکارێکی نادیار ئاگر لە بەشێک لە بازاڕی دارەسووتاوەکەی سلێمانی کەوتەوە و ژمارەیەک دووکان لە بەشی مەزادخانەی سەرەوەی بازاڕەکە سووتان.
رۆژی شەممە 5ـی نیسانی 2025 بەشێک لە دووکانەکانی مەزادخانەی سەرەوەی بازاڕی دارە سووتاوەکە سووتان و پارێزگاری سلێمانیش رایدەگەیەنێت هیچ ژیانێکی گیانی لێ نەکەوتووەتەوە.
ئاگرەکە نزیکەی کاتژمێر 04:00ـی بەرەبەیانی ئەمڕۆ کەوتووەتەوە و د. هەڤاڵ ئەبووبەکر، پارێزگاری سلێمانی رایگەیاند؛ "بەهیمەتی دڵسۆزانەی بەڕێوەبەر و تیمەکانی بەڕێوەبەرایەتیی پۆلیسی بەرگریی شارستانیی و بە هەماهەنگیی هاووڵاتیانی دڵسۆز و تیمەکانی فریاکەوتنی خێرای تەندروستیی و ئاسایش و پۆلیس و پۆلیسی هاتوچۆ، بەبێ هیچ زیانێکی گیانیی؛ ئاگرەکە کۆنترۆڵکرا".
تاوەکو ئێستا بەڕێوەبەرایەتی بەرگری شارستانی سلێمانی هیچ لێدوانێکی لەبارەی قەبارەی زیانەکان و هۆکاری ئاگرکەوتنەوەکە نەداوە و وەکو پارێزگاری سلێمانیش ئاماژەی پێدەدات: "لایەنە پەیوەندیدارەکان لێکۆڵینەوە لە هۆکاری ئاگرکەوتنەوەکە دەکەن".
کۆمێنت (0)
تا ئێستا هیچ کۆمێنتێک نەکراوە.