كۆمسیۆنی هەڵبژاردنەكانی عێراق دووپاتیكرده‌وه، له‌كاتی دیاریكراوی خۆیدا هه‌ڵبژاردن ئه‌نجام ده‌درێت.
جومانە غەلای، گوتەبێژی کۆمسیۆنی باڵای سەربەخۆی هەڵبژاردنەکانی عێراق ڕایگه‌یاند، به‌پێی دەستوور و یاسایی كۆمسیۆن ئەنجامدانی هەڵبژاردن لە وادەی دیاریکراودا ئه‌نجام ده‌درێت.
ئاماژه‌ی به‌وه‌شكرد، ژمارەی ئه‌و كه‌سانه‌ی كه بۆ یه‌كه‌مین جاره ده‌نگ ده‌ده‌ن و لەدایکبووی ساڵی دوو هه‌زار و حه‌وتن، گه‌یشتۆته یه‌ك ملیۆن كه‌س.
هه‌روه‌ها جومانه غه‌لای گوتیشی، پرۆسەی نوێکردنەوەی تۆماری دەنگدەرانيش بریتییە لە تۆمارکردنی دەنگدەری نوێ و راستکردنەوەی داتاکان و سڕینەوەی ناوی مردووەکان، جگە لە تۆمارکردنی هێزە چەکدارەکان و ئەمنییەکان و ئاوارەکان.
غه‌لایی له به‌رده‌وامی قسه‌كانیدا راگه‌یاند، کۆمسیۆن لەرێگەی یەک هەزار و حه‌فتا و نۆ ناوەندی تۆمارکردنەوە لە سەرتاسەری عێراق پێشوازی لە دەنگدەران دەکات، هه‌روه‌ها تیمی گەڕۆک رەوانەی دامودەزگا و فەرمانگەکانی حکومەت دەکات، بۆ هۆشیارکردنەوە سەبارەت بە گرنگی نوێکردنەوەی تۆماری هەڵبژاردن.
گوتەبێژی کۆمسیۆنی باڵای سەربەخۆی هەڵبژاردنەکانی عێراق ئه‌وه‌شی خسته‌روو: لە ئێستادا کۆمسیۆن کاردەکات بۆ ئامادەکردن و چاككردنی ئامێرەکانی هەڵبژاردن، بۆ دڵنیابوون لە بەڕێوەبردنی پرۆسەی هەڵبژاردن بەشێوەیەكی كارامه و ڕێگه نادات مافی هیچ ده‌نگده‌رێك بفه‌وتێت.
کۆمێنت (0)
تا ئێستا هیچ کۆمێنتێک نەکراوە.