نێچیرڤان بارزانی، سەرۆکی هەرێمی کوردستان لە پەیامێکدا پیرۆزبایی 66ـەمین ساڵیادی دەرچوونی یەکەم ژمارەی رۆژنامەی خەبات دەکات و رایدەگەیەنێت؛ "دەرچوواندنی بەردەوام و بێ وچانیی ڕۆژنامەی خەبات لە ڕۆژگاری سەختی شۆڕش و تێکۆشانەوە تا بە ئەمڕۆ دەگات، نموونەی کۆڵنەدان و ئیرادەی پتەو و نەپساوەی گەلەکەمانە".
دەقی پەیامی پیرۆزبایی نێچیرڤان بارزانی.
بەڕێزان سەرنووسەر و دەستەی نووسەران و کارمەندانی ڕۆژنامەی خەبات
لە یادى 66 ساڵه‌ى دەرچوونی ڕۆژنامەی خە‌باتدا، به گه‌رمى پیرۆزباییتان لێ دەکەم، هیوادارم ئەم دەزگا دێرینەی ڕۆژنامەگەریی کوردی، هەر پێشکەوتوو و پەرەسەندوو بێت.
دەرچوواندنی بەردەوام و بێ وچانی ڕۆژنامەی خەبات لە ڕۆژگاری سەختی شۆڕش و تێکۆشانەوە تا بە ئەمڕۆ دەگات، خۆی لە خۆیدا نموونەی کۆڵنەدان و ئیرادەی پتەو و نەپساوەی گەلەکەمانە.
خەبات ناونیشانێکی پڕشنگداری مێژووی ڕۆژنامەگەریی کوردستانە کە هاوشانی تێکۆشانی نەتەوەیی و نیشتمانی و داکۆکی لە ماف و دۆز و داوا ڕەواکانی گەلەکەمان و گەیاندنی پەیامە ئاشتیخوازانەکەی، قوتابخانەیەکیش بووە بۆ پێگەیاندنی ڕۆژنامەنووسان و میدیاکارانی بوێر و گەشەپێدانی ڕۆژنامەگەریی پیشەیی لە کوردستان.
لەم یادەدا سڵاو و دروود بۆ گیانی پاکی هەموو ئەو قەڵەمە تێکۆشەر و بەبڕشتانە دەنێرین کە لە قۆناغە جیاجیاکاندا لەم ڕۆژنامە سەنگینەدا کاریان کردووە و بەمڕۆیان گەیاندووە.
نێچیرڤان بارزانی
4ـی نیسانی 2025
کۆمێنت (0)
تا ئێستا هیچ کۆمێنتێک نەکراوە.