دادگەی دەستووری کۆریای باشور بە زۆرینەی رەهای دەنگەکان بڕیاری دوورخستنەوەی سەرۆککۆماری ئەو وڵاتەی پەسند کرد و دەبێ لە ماوەی 60 رۆژدا هەڵبژاردنی پێشوەختە بۆ دەستنیشانکردنی سەرۆککۆماری نوێ بکرێت.
رۆژی هەینی 4ـی نیسانی 2025 دادگای دەستووری کۆریای باشور بڕیاری دوورخستنەوەی یون سوک یۆل، سەرۆککۆماری ئەو وڵاتەی پەسند کرد، بەر لە راگەیاندنی بڕیاری دادگا لایەنگران و دژبەرانی سەرۆککۆمار رژانە سەر شەقام.
پۆلیسی کۆریا لە شەوی رابردووەوە کەوتووەتە ئامادەباشییەوە و فەرمانیان پێ کراوە، لە ئەگەری پێک هەڵپڕژانی خۆپێشاندەران و دروستبوونی توندوتیژیی، دەستبەکار بن.
بڕیاری دوورخستنەوەی سەرۆککۆماری کۆریای باشور دوای ئەوە سەری هەڵدا، لە کانوونی یەکەمی پار، بۆ ماوەیەکی کاتی قەدەخەی هاتووچۆی لە سیولی پایتەخت راگەیاند و ئەوەش بووە هۆی سەرهەڵدانی تەنگژەیەکی گەورەی سیاسی لەو وڵاتە.
دادگای باڵای کۆریا رایگەیاندووە، هەوڵی سەرۆککۆمار بۆ راگەیاندنی قەدەخەی هاتووچۆ پێچەوانەی دەستووری وڵاتە، هەرچەند لە 14ـی کانوونی یەکەمی پارەوە پەرلەمانی کۆریای باشوور بڕیاری دوورخستنەوەی یون سوک یۆل بە زۆرینەی دەنگ پەسند کردبوو و سەرجەم دەسەڵاتەکانی لێ سەندرابوویەوە، بەڵام بەپێی دەستوور دەبوایە دادگەی دەستوور ئەم بڕیارەی پەرلەمان پەسند بکات بۆ ئەوەی بە فەرمی ناونیشانی سەرۆککۆماری لە وەربگیرێتەوە.
بەپێی دەستووری کۆریای باشور سەرۆککۆمار تەنیا کاتێک بۆی هەیە غەدەخەی هاتووچۆ رابگەیەنێت کە وڵات لە دۆخی شەڕ دا بێت و پەرلەمانیش بە زۆرینەی دەنگ ئەو بڕیارە پەسند بکات، بەڵام کانوونی یەکەمی پار، سەرۆککۆمار فەرمانی بە سوپا کرد رێگە نەدەن پەرلەمانتاران بچنە پەرلەمانەوە و دەنگ لە دژی بڕیارەکەی بدەن.
بڕیارەکەی ئەمڕۆی دادگەی دەستووری کۆریای باشور، یون سوک یۆلی بە فەرمی لە پۆستی سەرۆککۆماری لادا و دەبێت لە ماوەی 60 رۆژدا هەڵبژاردنی پێشوەختە بکرێت و سەرۆککۆمارێکی نوێ بخرێتە شوێنەکەی.
کۆمێنت (0)
تا ئێستا هیچ کۆمێنتێک نەکراوە.