گرینگترین خۆراك بۆ هێشتنەوەی دڵ بە تەندروستییەكی باش ریشاڵە، چونكە ریشاڵەكان دەبنە هۆكاری دابەزینی ئاستی چەوری و كۆلیسترۆلی زیانبەخش و رێكخستنی رێژەی شەكرە لە خوێندا و هەروەها دابەزینی پاڵەپەستۆی خوێن و دابەزاندنی كێش، هەموو ئەمانەش بۆ تەندروستی دڵ باشن.
بۆ خوێنەرانی (كوردستان تیڤی) 10 جۆری خواردن دەخەینەڕوو كە كاریگەری ئێجگار باشیان هەیە لە هێشتنەوەی دڵ بە تەندروستییەكی باش، ئەوانیش بریتین لەمانەی خوارەوە:
1- شۆفان: رێژەیەكی زۆر لە ماددەی بێتا گلۆكانی تێدایە كە ئەویش جۆرێكە لە ریشاڵ و رۆلێكی سەرەكی دەبینێت لە دابەزاندنی رێژەی كۆلیسترۆلی زیانبەخش، رۆژانە خواردنی پارچەیەك شۆفان دەبێتە هۆكار بۆ تەندروستی دڵ.
2- فاسولیا و پاقلەمەنییەكان: فاسولیا و نیسك و نۆك و پاقلەمەنییەكانی دیكە رێژەیەكی زۆر لە ریشاڵیان تێدایە و دەبنە هۆكاری دابەزاندنی رێژەی چەوری و كۆلیسترۆل و هەروەها هاوسەنگی رێژەی شەكر لە خوێندا.
3- توو: توو بە سەرجەم جۆر و رەنگەكانیەوە سەرچاوەیەكی باشن بۆ ریشاڵ و دژەئۆكسانەكان كە دەبنە هۆكاری كەمكردنەوەی هەوكردن و ماندوێتی دڵ.
4- ئەڤۆكادۆ: جگە لەوەی رێژەیەكی باش لە چەوری سوودبەخش و تەندروستی تێدایە، هەروەها رێژەیەكی باشیش ریشاڵی تێدایە كە ئاستی چەوری و كۆلیسترۆلی زیانبەخش دادەبەزێنێت و دەمارەكانی خوێن چالاكتر دەكات.
5- چەرەزات: چەرەزاتەكان بەشێوەیەكی گشتی رێژەیەكی باش لە ریشاڵ و چەوری تەندروست و ئۆمێگا سێیان تێدایە و هەموو ئەمانەش سوودبەخشن بۆ دڵ.
6- دانەوێلەكان: گەنم و برنج و دانەوێلەكانی دیكە رێژەیەكی باش ریشاڵیان تێدایە كە ئاستی پاڵەپەستۆی خوێن و رێژەی كۆلیسترۆل دادەبەزێنن.
7- سێو: یەكێكە لەو میوانەی چەوری لەنێو دەمارەكان دەمژێت.
8- سەوزە پەلكدارەكان: سپێناخ و كەلەم و سەوزە پەلكدارەكانی دیكە رێژەیەكی زۆری ریشاڵیان تێدایە و هۆكار دەبن بۆ تەندروستی دەمارەكان.
9- پەتاتە: رێژەیەكی زۆر باشی ریشاڵ و پۆتاسیۆمی تێدایە و پاڵەپەستۆی خوێن دادەبەزێنن.
10- هەرمێ: یەكێكە لەو میوانەی رێژەیەكی زۆر لە ریشاڵی تێدایە و كرداری هەرس باشتر دەكات و ئاستی كۆلیسترۆل دادەبەزێنێت.
کۆمێنت (0)
تا ئێستا هیچ کۆمێنتێک نەکراوە.