به پێی ئاماره فه‌رمییه‌كان ، ژمارەی ئەو کەسانەی لە ئاکامی ڕوودانی دوو بوومەلەرزەكه‌ی ڕۆژی هه‌ینی ڕابردوو 28ی ئادار لە میانمار گیانیان لەدەستداوە کە گوڕەکانیان 7،7 و 6،4 پلە بوو بەپێوەری ڕێختەر، دوو هەزار و 800کەسی تێپەڕاند .
كه‌ناڵی فه‌رمی ته‌له‌فزیۆنی چین بڵاویكردووه‌ته‌وه ، جەنەراڵ مین ئاونگ هلاینگ ڕێبەری ئیدارەی سەربازیی حكوومه‌تی میانمار، ڕوونکردنەوەی سەبارەت بەو دوو بوومەلەرزه داوە کە لە ڕۆژی 28ی ئاداردا لە وڵاتەکە ڕوویاندا و ڕایگه‌یاندووه ، دۆخێكی وێرانكه‌ر له وڵاتدا دروست بووه و تا ئێستا قه‌باره‌ی زیانه ماددی و گیانیان نه‌خه‌ملێنراوه و پرۆسه‌ی گه‌ڕانیش به‌دوای قوربانیانی بوومه‌له‌رزه‌كه له لایه‌ن تیمه‌كانه‌وه به‌رده‌وامه.
مین ئاونگ هلاینگ ئاماژەی بەوەش کردووه ، هەتا ئێستا دوو هەزار و 800 کەس لەو بوومەلەرزانەدا گیانیان لەدەستداوە و، چاوەڕوان دەکرێت ژمارەکە سێ هەزارى تێبپەڕێنێت .
هەروەها مین ئاونگ هلاینگ ڕاشیگه‌یاندووه ، ژمارەی بریندارانی هه‌ردوو بوومەلەرزەکه بۆ چوار هەزار و 521 کەس بەرزبووەتەوە و، هێشتا 441 کەسیش بێسەروشوێنن .
جێی باسه ، بەهۆی بوومەلەرزەکانەوە حكوومه‌تی میانمار بۆ ماوەی یەک هەفتە ماتەمینی گشتی لە میانمار ڕاگەیاندووه .
کۆمێنت (0)
تا ئێستا هیچ کۆمێنتێک نەکراوە.