ئاگربەستی نێوان ئیسرائیل و حەماس دوو هەفتەیە شکستی هێناوە و بەیانی ئەمڕۆ وەزیری بەرگریی ئیسڕائیل رایگەیاند، ئۆپەراسیۆنەکانمان لە غەزە فراوانتر دەکەین.
بەرەبەیانی رۆژی چوارشەممە 2ـی نیسانی 2025 ئیسڕائیل هێرشی وشکانی و ئاسمانی بۆسەر غەزە دەستپێکرد و چەند یەکەیەکی نوێی سەربازی هێزی وشکانیی ئەو وڵاتە لە چەند قۆڵێکەوە هێرشیان بۆسەر رەفەح دەستپێکرد.
ئیسڕائیل کانتر، وەزیری بەرگریی ئیسڕائیل رایگەیاند؛ "سوپای ئیسڕائیل بۆ پاککردنەوەی ناوچەکە لە حەماس و گەڕاندنەوەی بارمتەکان، بەشێکی گەورەی غەززە دەخاتە سەر ناوچە ئارامەکانی ئیسڕائیل و ئەو ناوچانەش کە شەڕیان تێدا دەکرێت، چۆڵ دەکرێن".
هاوکات، میدیاکانی فەلەستین بڵاویان کردووەتەوە، بەرەبەیانی ئەمڕۆ چوارشەممە، فڕۆکە جەنگییەکانی ئیسڕائیل رەفەح و خان یونسیان بۆردومان کردووە و هێزی پیادەی سوپای ئیسڕائیل هێرشی بۆسەر ئەو ناوچانە دەستپێکردووە.
لەدوای تێکشکانی ئاگربەستی نێوان ئیسڕائیل و حەماس، هەفتەی رابردوو نەتەوە یەکگرتووەکان رایگەیاند، لە 24ـی نیسانەوە چالاکییەکانی لە غەززە کەم دەکاتەوە، ئەو بڕیارە دوای ئەوە هات کە هەشت پزیشکی فەلەستینی و شەش ئەندامی دامەزراوەی بەرگریی مەدەنی غەزە و کارمەندێکی نەتەوە یەکگرتووەکان بەهۆی هێرشی ئیسڕائیلەوە گیانیان لەدەستدا.
ئاگربەستی نێوان ئیسڕائیل و حەماس بە ناوبژیوانی ئەمەریکا لە رۆژی 19ـی کانوونی دووەمی ئەمساڵ دەستیپێکرد و دەیان بارمتەی ئیسڕائیلی لەگەڵ سەدان گیراوی فەلەستینی گۆڕانەوە، بەڵام لە گەڕی دووەمی دانوستانەکان بۆ درێژەدان بە ئاگربەستەکە، نەگەیشتنە رێککەوتن و رۆژی 18ـی ئایار شەڕ لەنێوان حەماس و ئیسڕائیل دەستیپێکردەوە.
راگەیاندنی هێرشی ئاسمانی و زەمینی ئیسڕائیل بۆ سەر غەزە لەکاتێکدایە تاوەکو ئێستاش 59 بارمتەی ئیسڕائیلی لە دەستی حەماسن و لە نێوخۆی ئیسڕائیلدا پاڵەپەستۆیەکی زۆر خراوەتە سەر حکومەت بۆ گەڕاندنەوەی سەرجەم بارمتەکان.
کۆمێنت (0)
تا ئێستا هیچ کۆمێنتێک نەکراوە.