پسپۆڕێكی ئابووری هۆكاری دابەزینی بەهای دۆلاری ئەمەریكی بەرامبەر بە دیناری عێراقی لە چەند رۆژی رابردوودا لە بۆڕسە و نووسینگەكانی گۆڕینەوەی دراو لە تەواوی عێراق ئاشكرا دەكات.
ناسڕ تەمیمی پسپۆڕی ئابووری دەڵێت: چەند رۆژێكە بەهای دۆلار بەرامبەر بە دینار دابەزینی گەورەی بەخۆیەوە بینیوە، هۆكارەكەشی پەیوەندی بە مانگی رەمەزانی پیرۆزەوە هەیە.
دەشڵێت: ئەم دابەزینە كاتییە، بەهۆی ئەوەی لە ناوخۆدا داواكاری لەسەر دۆلار بەتایبەیتش لە كڕینی ئۆتۆمبێل و زەویوزار و بابەتەكانی دیكە كەمبووەتەوە.
هەروەها دەڵێت: بە نزیكبوونەوە لە رۆژانی جەژن دووبارە بەهای دۆلار بەرز دەبێتەوە و هەر 100 دۆلارێك دەگاتەوە 150 بۆ 151 هەزار دینار.
پسپۆڕێكی ئابووری جەختیشی كردەوە كە ئەم دابەزینە لەناكاوەی دۆلار پەیوەندی بە هیچ قەیران و بابەتێكی دیكەوە نییە، تەنیا هۆكارەكەی كەمی داواكارییە لەسەر دۆلار.
ماوەی چەند رۆژێكە بەهای دۆلار بەرامبەر بە دیناری عێراقی لە هەرێمی كوردستان و تەواوی عێراق رووی لە دابەزین كردووە، ئەمڕۆ یەكشەممە لە هەولێر و بەغدا بەهای 100 دۆلار گەیشتە 146 هەزار و 500 دینار.
کۆمێنت (0)
تا ئێستا هیچ کۆمێنتێک نەکراوە.