سوپای ئیسڕائیل ئەمڕۆ هەینی كوشتنی فەرماندەیەكی باڵای حزبوڵای لوبنانی بە بۆردومانێكی فڕۆكە جەنگییەكان راگەیاند.
ئەڤیغای ئەدرەعی گوتەبێژی سوپای ئیسڕائیل رایگەیاند: دوێنێ پێنجشەممە فڕۆكە جەنگییەكان لە ناوچەی هەرمل لە رۆژهەڵاتی لوبنان ئۆتۆمبێلێكیان كردە ئامانج و تەقاندیانەوە.
راشیگەیاند: لە بۆردومانەكەدا فەرماندەیەكی باڵای حزبوڵا بەناوی محەمەد مەهدی عەلی شاهین كراوەتە ئامانج كە سەرپەرشتیاری كڕین و دابینكردنی چەك و پێداویستییە سەربازییەكان بووە بۆ حزبوڵا.
هەروەها رایگەیاند: محەمەد مەهدی عەلی شاهین یەكێك بووە لە فەرماندە چالاكەكانی حزبوڵا كە سەرپەرشتیاری گواستنەوەی چەك و پێداویستی سەربازی كردووە لە سووریاوە بۆ لوبنان.
گوتەبێژی سوپای ئیسڕائیل ئاماژەی بەوەشداوە كە ئەم فەرماندەیەی حزبوڵا مەترسی راستەوخۆی هەبووە لەسەر دەوڵەت و هاووڵاتییانی ئیسڕائیل، هەروها مەترسییەكی گەورەش بووە بۆ هەڵوەشاندنەوەی رێككەوتن و ئاگربەست لەنێوان ئیسڕائیل و لوبنان.
کۆمێنت (0)
تا ئێستا هیچ کۆمێنتێک نەکراوە.