دەستەی گشتی كەشناسی و بوومەلەرزەزانی عێراق ئاشكرای كرد كە مانگی رابردوو 62 بوومەلەرزە لە ناوخۆی عێراق روویانداوە، بەشێك لە بوومەلەرزەكانیش لە هەولێر و سلێمانی و دهۆك و كەركووك بوونە.
دەستەكە لەمیانەی خستنەڕووی راپۆرتی مانگانەدا رایگەیاند: مانگی رابردوو بەشێوەیەكی گشتی 92 بوومەلەرزە كاریگەرییان لەسەر عێراق هەبووە، لەو ژمارەیەش 62 بوومەلەرزە لەناوخۆی عێراق روویانداوە.
راشیگەیاند: چەقی بوومەلەرزەكانی ناوخۆی عێراق لە هەریەك لە پارێزگاكانی هەولێر، سلێمانی، دهۆك، كەركووك، دیالە، نەینەوا و میسان بووە.
هەروەها رایگەیاند: زۆرترین بوومەلەرزەكان لە شارۆچكەی خانەقین بووە لە سنووری پارێزگای دیالە.
دەستەی گشتی كەشناسی و بوومەلەرزەزانی ئاماژەی بەوەش دا كە ئەو بوومەلەرزانەی لە دەرەوە روویانداوە و كاریگەرییەكەیان گەیشتۆتە عێراق بەمشێوەیە بووە، ئێران 22 بوومەلەرزە و توركیا 8 بوومەلەرزە.
جەختیشی كردەوە كە هێزی بوومەلەرزەكان بەشێوەیەكی گشتی لەنێوان 1-5 پلەی رێختەر بووە و لە قوڵایی 4-38 كیلۆمەتر روویانداوە.
کۆمێنت (0)
تا ئێستا هیچ کۆمێنتێک نەکراوە.