گوتەبێژی ئۆپڕاسیۆنە سەربازییەكانی سووریا ئەمڕۆ چوارشەممە بەفەرمی ئەحمەد شەرع سەرۆكی دەستەی تەحریری شامی وەك سەرۆك كۆماری سووریا بۆ قۆناغی راگوزەر دەستنیشان كرد، هەروەها هەڵوەشاندنەوەی دەستوور و پەرلەمان و سوپای رژێمی بەشار ئەسەدی راگەیاند.
حەسەن عەبدولغەنی گوتەبێژی ئۆپڕاسیۆنە سەربازییەكانی سووریا لە كۆنگرەی رۆژنامەوانی سەركەوتنی شۆڕشی سووریا، بڕیارە نوێیەكانی ئیدارەی نوێی وڵاتەكەی بڵاوكردەوە كە بریتی بوون لەمانەی خوارەوە:
- رۆژی 8ی كانوونی یەكەمی هەموو ساڵێك بە رۆژی نیشتمانی سووریا دەستنیشان كرا.
- هەڵوەشاندنەوەی دەستووری ساڵی 2012ی سووریا و راگرتنی كاركردن بە سەرجەم یاسا تایبەتەكان.
- هەڵوەشاندنەوەی ئەنجوومەنی گەل (پەرلەمان)ی سەردەمی رژێمی پێشوو.
- هەڵوەشاندنەوەی سوپای رژێمی پێشوو، دووبارە بنیاتنانەوەی سوپای سووریا لەسەر بنەمای نیشتمانی.
- هەڵوەشاندنەوەی سەرجەم هێزە ئەمنی و میلیشیاكانی سەر بە رژێمی پێشوو و پێكهێنانی دامەزراوەیەكی نوێی ئەمنی بۆ پاراستنی ئاسایشی هاووڵاتییان.
- هەڵوەشاندنەوەی حزبی بەعسی عەرەبی ئیشتراكی و رێگەنەدان بە دروستكردنەوەی لەژێر هەر ناوێكدا.
- هەڵوەشاندنەوەی سەرجەم گرووپە چەكدارەكانی بەشداربوو لە شۆڕشی سووریا و تێكەڵكردنەوەیان لەگەڵ دامەزراوەكانی دەوڵەت.
- دیاریكردنی ئەحمەد شەرع بە سەرۆك كۆماری سووریا بۆ قۆناغی راگوزەر.
کۆمێنت (0)
تا ئێستا هیچ کۆمێنتێک نەکراوە.