ژن و پیاوێكی ئەڵمانی لەبەردەم دادگا دانیان بەوە دانا كە تاوانێكی قێزەوەنیان بەرامبەر دوو ئافرەتی ئۆكڕاینی ئەنجامداوە بۆ دزینی منداڵە تازەلەدایكبووەكەیان.
ژن و پیاوەكە كە هاوسەری یەكن، ئەمڕۆ سێشەممە لە دادگای مانهایم لە ئەڵمانیا دانیان بەوە دانا بۆ دزینی كۆرپەیەكی تازەلەدایكبوو، دایكی منداڵەكە و داپیرەیان كوشتووە كە تەمەنیان 27 و 51 ساڵ بووە.
پیاوەكە لە دادگا گوتوویەتی: هاوسەرەكەم ئارەزووی منداڵێكی دیكەی هەبووە، بۆیە هەردووكمان بەیەكەوە پلانی ئەنجامدانی تاوانەكەمان رێكخست.
هەروەها گوتوویەتی: رۆژی 6ی ئاداری ساڵی رابردوو لە چێشتخانەكەمان دایك و داپیرەی منداڵەكەمان بە دەرمان بێ هۆش كرد و دواتریش بە ئامێرێكی تیژی بڕین هەردووكمان كوشتن.
ئاماژەی بەوەشداوە: دوای كوشتنیان تەرمی دایكە 27 ساڵییەكەمان فڕێدایە نێو رووباری راین، تەرمی داپیرە تەمەن 51 ساڵییەكەشمان لەژێر خۆڵ شاردەوە.
چەند رۆژێك دوای ئەنجامدانی تاوانەكە، لە رۆژی 13ی ئاداری رابردوو تەرمی دایكەكە لەلایەن كەسێكەوە لەنێو رووباری راین دۆزرایەوە، دوای ئەوەش دوو هاوسەرە تۆمەتبارەكە لەلایەن پۆلیسەوە دەستگیركران و منداڵەكەیان لێ سەندرایەوە.
ئێستا كۆرپەكە لای پووری لە ئۆكڕاینا ژیان بەسەر دەبات، چاوەڕوانیش دەكرێت دادگای ئەڵمانیا زیندانی هەتاهەتایە بەسەر دوو هاوسەرە تۆمەتبارەكە بسەپێنرێت.
کۆمێنت (0)
تا ئێستا هیچ کۆمێنتێک نەکراوە.