سەرۆكی حكوومەتی هەرێمی كوردستان ئەمڕۆ سێشەممە پەیامێكی پیرۆزبایی بە بۆنەی جەژنی لە دایکبوونی حەزرەتی مەسیح (د.خ) بڵاو كردەوە.
مەسرور بارزانی سەرۆكی حكوومەت دوای هیواخواستنی جەژن و پشوویەكی ئارام و پڕ لە شادی بۆ كریستیانەكان، جەختی كردەوە كە كوردستان هەمیشە نیشتمانی بەیەکەوەژیانی ئایین و ئایینزای جۆراوجۆر بووە، پێویستە هەمووان زیاتر پەرە بە کولتووری بەیەکەوەژیانی ئاشتییانە بدەن.
ئەمەی خوارەوە دەقی پەیامە پیرۆزباییەكەی مەسرور بارزانی سەرۆكی حكوومەتی هەرێمی كوردستانە.
بە بۆنەی جەژنی لەدایکبوونی حەزرەتی مەسیح (دروودی خوای لەسەر بێت)، پیرۆزبایی لە کریستیانانی کوردستان و عێراق و جیهان دەکەم و هیوای جەژن و پشوویەکی ئارام و پڕ لە شادیيان بۆ دەخوازم.
كوردستان هەمیشە نیشتمانی بەیەکەوەژیانی ئایین و ئایینزای جۆراوجۆر بووە و پێویستە هەموومان، زیاتر پەرە بە کولتووری بەیەکەوەژیانی ئاشتییانە و پتەوکردنی ئاشتيی کۆمەڵایەتی و برایەتی و تەبایی نێوان گشت پێکهاتەکانی کوردستان بدەین.
جەژنی لەدایکبوون پیرۆز بێت و هەمیشە لە خۆشیدا بژین.
مەسرور بارزانی
سەرۆکی حکوومەتی هەرێمی کوردستان
2024/12/24
کۆمێنت (0)
تا ئێستا هیچ کۆمێنتێک نەکراوە.