ئەمڕۆ پێنجشەممە ڕێبەر ئەحمەد وەزیری ناوخۆی هەرێمی کوردستان پەیوەندییەکی تەلەفۆنی لە ئیڤێت کووپەر وەزیری ناوخۆی بەریتانیاوە پێگەیشت.
لە پەیوەندییەکەدا، گفتوگۆ لەبارەی چەند بابەتێکی ئەمنی و پرسەکانی جێی بایەخی هاوبەش کرا.
هەردوو وەزیری ناوخۆی هەرێمی کوردستان و بەریتانیا، بیروڕایان لەبارەی پێشهاتە ئەمنییەکانی ئەم دواییەی ناوچەکە، بەتایبەتی گۆڕانکارییەکانی سووریا ئاڵوگۆڕ کرد و جەختیان لە گرینگی پەرەپێدانی هاریکاری و هاوئاهەنگیی نێوان هەردوولا بۆ ڕووبەڕووبوونەوەی ئاڵنگارییەکان کردەوە.
دواتریش هەردوو وەزیر پابەندبوونی خۆیان بە بەرەنگاربوونەوەی تاوانی ڕێکخراو و سنووردارکردنی کۆچی نایاسایی دووپات کردەوە و جەختیان لە پێویستی برەودان بە کارکردنی هاوبەش لەپێناو دەستەبەرکردنی سەقامگیری و ئاسایشی ناوچەکە کردەوە.
وەزیری ناوخۆی هەرێمی کوردستان خواستی حکوومەتی هەرێمی بۆ بەهێزترکردنی هاوبەشیی نێوان هەرێمی کوردستان و شانشینی یەکگرتوو و پتەوکردنی زیاتری پەیوەندیی دوولایەنە دووپات کردەوە.
کۆمێنت (0)
تا ئێستا هیچ کۆمێنتێک نەکراوە.