ئەمڕۆ چوارشەممە 6ی تشرینی دووەمی 2024 لە سەلاحەددین، سەرۆك مەسعود بارزانی پێشوازی لە ستیڤن هیتچن باڵیۆزی بریتانیا لە عێراق كرد.
لە دیدارەكەدا كە ئاندرو بیزلی كونسوڵی بریتانیا لە هەولێریش ئامادەی بوو، باڵیۆزی بریتانیا لە عێراق پیرۆزبایی سەركەوتنی هەڵبژاردنی ئۆكتۆبەری ڕابردووی پەرلەمانی كوردستان و ڕێژەی بەرزی بەشداریی خەڵك لە دەنگدان و بەڕێوەچوونی لە كەشێكی ئارامدا لە سەرۆك بارزانی كرد.
لای خۆیەوە سەرۆك بارزانی سوپاسی گەلی كوردستانی كرد كە بەم ڕێژە بەرزە بەشداریی هەڵبژاردنیان كرد.
دانوساندنەكانی پەیوەست بە پێكهاتە و ئەجێندای حكوومەتی داهاتووی هەرێمی كوردستان تەوەری تری ئەو دیدارە بوو، سەرۆك بارزانی جەختی لەوە كردەوە كە پارتی بۆ پێكهێنانی حكوومەت ڤیتۆی لەسەر كەس نییە و پێویستە گفتوگۆكان لە چوارچێوەی یەك هەرێم و یەك پەرلەمان و یەك حكوومەت و یەك هێزی پێشمەرگەدا بێت.
هەر لەو دیدارەدا بیروڕا لەبارەی دەرئەنجامەكانی هەڵبژاردنەكانی ئەمەریكا و كاریگەریی لەسەر هاوكێشەكانی جیهان و ناوچەكە و هەروەها بارودۆخی سیاسیی عێراق و هەڵبژاردنی سەرۆكی ئەنجوومەنی نوێنەرانی عێراق ئاڵوگۆڕ كرا.
کۆمێنت (0)
تا ئێستا هیچ کۆمێنتێک نەکراوە.