لیژنەی باڵای ئامادەكاری مەڕاسیمی چلەی ماتەمینی ئیمامی حوسێن ئاشكرای كرد، تا ئێستا زیاتر لە دوو ملیۆن زیارەتكار بە مەبەستی بەشداریكردن لە مەڕاسیمەكە هاتوونەتە نێو خاكی عێراقەوە.
میقداد میری گوتەبێژ بەناوی لیژنەی باڵای ئامادەكاری مەڕاسیمی چلەی ماتەمینی لە كۆنگرەیەكی رۆژنامەوانیدا گوتی: تا ئێستا 2 ملیۆن و 200 هەزار زیارەتكار بە مەبەستی بەشداریكردن لە مەڕاسیمی چلەی ماتەمینی ئیمامی حوسێن هاتوونەتە نێو خاكی عێراق.
راشیگەیاند: لەو ژمارەیەش 679 زیارەتكار مەڕاسیمەكانیان جێبەجێ كردووە و گەڕاونەتەوە وڵاتەكانیان.
هەروەها رایگەیاند: لە چوارچێوەی بەشدارییەكان بۆ مەڕاسیمی چلەی ماتەمینی 39 رووداوی هاتوچۆ روویداوە، بەهۆیەوە 9 زیارەتكار گیانیان لەدەستداوە و 29ی دیكەش بریندار بوون.
مەڕاسیمی چلەی ماتەمینی ئیمامی حوسێن لەنێو شیعەكان بایەخێكی گرینگی هەیە و بۆ ئەمساڵ مەڕاسیمەكە دەكەوێتە رۆژی 25ی ئەم مانگە، بۆ ئەم مەبەستەش چەندان پارێزگای دیكە پشوویان بۆ مەڕاسیمەكە راگەیاندووە.
کۆمێنت (0)
تا ئێستا هیچ کۆمێنتێک نەکراوە.