ڕاگەێندراوێک لە پارێزگاى هەولێرەوە لە بارەى کارکردن لە پڕۆژەى ئاوى ئیفراز سێ

پارێزگای هه‌ولێر راگه‌یه‌ندراوێكی له‌ باره‌ی كاركردن له‌ پڕۆژه‌ی ئاوی ئیفراز سێ بڵاوكرده‌وه‌.

له‌ ڕاگه‌یه‌ندراوه‌كه‌ی پارێزگادا هاتووه‌، پڕۆژەی ئاوی ئیفراز سێ، کە ئاوی پاک بۆ 40%ی دانیشتووانی شارى هەولێر دابین دەکات، بەهۆی شکانی بۆڕی گوێزەرەوەی ئاوی ئیفراز 3 لە جۆری GRP لە نزیک ووێستگەی پاڵاوتنی ئاوی ئیفراز سێ دوای چاککردنەوەی بۆڕیەکە هێشتاش نەدەتوانرا پڕۆژەکە بە توانای خۆی کاربکات و دەبوایە پێنج پەمپ کاربکات کە توانای هەر یەکەیان (2 هەزار مەتر سێجا ئاو) لە کاتژمێرێكدایە کە دەبوو 10 هەزار مەتر ئاو لە کاتژمێرێك بۆ شاری هەولێر بگوازێتەوە، بەناچاری کرابوو بە چوار پەمپ، بەمشێوەیەش ووێستگەی پاڵاوتنی ئاوی ئیفراز3 بە ڕێژەى 80%ی توانای خۆی کاری دەکرد.

پارێزگای هه‌ولێر ئاماژه‌ی به‌وه‌ش كردووه‌، بۆ چارەسەرکردنى ئەوکێشەیە و لە پێناو زیاتر خزمەتکردنی شاری هەولێر لە گەیاندنی خزمەتگوزاریی زیاترى ئاو بۆ هاوڵاتییان، لە سەر بودجەی پارێزگای هەولێر پڕۆژەى گۆڕینی  هێڵى 1500ملم جۆری GRP بۆ جۆری کاربۆن ستیل لە هێڵی گوێزەرەوەی  ئیفراز 3 بەکۆتایی هات، بەمەش 2 هەزار مەتر سێجا ئاو لە کاتژمێرێك زیاددەبێت، هاوتەریب لەگەڵ ئەم پڕۆژەیەدا پڕۆژەی چاککردنەوە و کارپێکردنى ووێستگەیەکی ترى پڕۆژەى پاڵاوتنی ئاوی ئیفراز3 بە توانای (5 سەد مەتر سێ جا ئاو) لە کاتژمێرێك دەکەوێتەکار، کە کۆی گشتی لە ڕۆژێکدا (60 هەزار مەتر سێ جا ئاو) بۆ شاری هەولێر زیاد دەکات.

له‌ كۆتاییدا پارێزگای هه‌ولێر ڕایگه‌یاندووه‌، بۆ ئەو مەبەستە ئاگادارى هاوڵاتیانى شارى هەولێر دەکەینەوە، لە ئێستادا بەهۆى کارکردن لە بەستانەوەى هێڵى نوێى پڕۆژەکە بەیەکترەوە، لە ئەمڕۆ 2024.8.5 لە کاتژمێر 12 نیوەڕۆ بۆ ماوەی 34 کاتژمێر پڕۆژەکە ڕادەوەستێت، بۆیە داواکارین لە هەموو لایەک لەو ماوەیەدا دەست بە ئاو بگرن.