بەڕێوەبەرایەتی پۆلیسی پارێزگای هەولێر دەستگیركردنی ئەو تۆمەتبارەی راگەیاند كە هەڵسابوو بە ئەنجامدانی چەندان دزی لەنێو ئۆتۆمبێلدا.
پۆلیسی هەولێر رایگەیاند: دوای ئەوەی چەند سکاڵایەکمان پێگەیشت لەلایەن هاووڵاتییانەوە بە هەبوونی حاڵەتی دزیکردن، لە ئەنجامی لێکۆڵینەوەی تیمەکانمان و کۆکردنەوەی زانیاری، توانیمان بە زووترین کات شوێنی تۆمەتبار دەستنیشان بکەین.
راشیگەیاند: دوای وەرگرتنی بڕیاری دادوەری لێکۆڵینەوە، تۆمەتبارێکمان بە ناوی (س. ش. ن) دەستگیر کرد، کە هەڵسابوو بە دزینی کەلوپەلی ناو ئۆتۆمبێل لە ڕێگای کردنەوەی جامەکانیان.
هەروەها رایگەیاند: تۆمەتبار دانی نا بە تاوانەکەیدا، بۆیە پەڕاوی لێکۆڵینەوەی بۆ کراوەتەوە و ئێستا بەپێی ماددەی (444) ڕاگیراوە و ڕێکاری یاسایی بەرامبەر دەگرینە بەر.
بەڕێوەبەرایەتیی پۆلیسی پارێزگای هەولێر هاووڵاتییانی دڵنیا كردەوە کە سەر و ماڵیان پارێزراوە، بەڵام لە هەمانكاتیشدا جامی ئۆتۆمبێل و دەرگا و شوێنە تایبەتەکانیان بە کراوەیی بەجێ نەهێڵن.
کۆمێنت (0)
تا ئێستا هیچ کۆمێنتێک نەکراوە.