لە هەولێر دزێكی مەترسیدار دەستگیر كرا

بەڕێوەبەرایەتی پۆلیسی پارێزگای هەولێر رایگەیاند، دزێكی مەترسیدارییان دەستگیركردووە كە لە ماوەی رابردوودا هەڵساوە بە چەندین تاوانی دزیكردن.

پۆلیسی هەولێر بڵاوی كردەوە: دوای ئەوەی چەندین سکاڵامان پێگەیشت لەلایەن هاووڵاتییانەوە لەسەر ڕوودانی چەندین حاڵەتی دزیکردن، بۆیە دەستبەجێ تیمەکانمان دەستیان بە لێکۆڵینەوە کرد.

بڵاویشی كردەوە: لە ئەنجامدا توانیمان شوێنی تۆمەتبار دەستنیشان بکەین و دوای وەرگرتنی ڕەزامەندیی دادوەری لێکۆڵینەوەی هەولێر، تۆمەتبارەكە دەستگیر کرا.

هەروەها بڵاوی كردەوە: تۆمەتبارەكە لە ماوەی رابردوودا هەڵسابوو بە دزینی حەوت ئۆتۆمبێلی جۆراوجۆر، هەروەها چەندین ساڵیانەی ئۆتۆمبێل و کۆمەڵێک پارە و چەندین بەڵگەنامەی دیکەشی ساختە کردبووە و بەکاریهێنابوو لەگەڵ چەکی بێ مۆڵەت.

پۆلیسی هەولێر ئاماژەی بەوەش دا كە ئێستا پەڕاوی لێکۆڵینەوە بۆ تۆمەتبارەكە کراوەتەوە و دانی ناوە بە تاوانە جۆربەجۆرەکاندا و بە بڕیاری دادوەر ڕاگیراوە.