ئەمڕۆ یەكشەممە ساسان عەونی وەزیری شارەوانی و گەشتوگوزار بەمەبەستی خێراكردنی پرۆسەی دابەشكردنی زەوی بەسەر فەرمانبەران و خانەنشینان، چوارەمین كۆبوونەوەی لەگەڵ ڕاوێژكاران، بەڕێوەبەرانی گشتی لە وەزارەت و سەرجەم بەڕێوەبەرانی گشتی شارەوانییەكان و سەرۆكی شارەوانییەكان و بەڕێوەبەرانی نەخشەدانانی ئاوەدانی لە پارێزگە و ئیدارە سەربەخۆكان ئەنجام دا.
كۆبوونەوەكە بۆ خێراتركردنی پرۆسەی دابەشكردنی زەوی و ئاشناكردنی شارەوانییەكان بوو بە خاڵەكانی كۆنووسێكی پەسەندكراو كە لەلایەن مەسرور بارزانی سەرۆكی حكوومەتی هەرێمی كوردستان ڕەزامەندی لەسەر دراوە بۆ خێراتركردنی پرۆسەی دابەشكردنی زەوی و پێدانی دەسەڵات بە وەزیری شارەوانی و گەشتوگوزار بۆ ئەوەی بەخێرایی زەوی بۆ فەرمانبەران دابین بكرێت و لەو شوێنانەی گرفت لەبەردەم پرۆسەكە دروست دەبێت، بەزوویی چارەسەریان بكەن.
ساسان عەونی لەو كۆبوونەوەیەدا ڕایگەیاند: لەمڕۆوە سەرجەم شارەوانییەكان و نەخشەدانانی ئاوەدانی پێویستە بە هاوئاهەنگیی لەگەڵ پارێزگاكان و بەڕێوەبەرایەتییەكانی كشتوكاڵ و سەرجەم لایەنە پەیوەنددارەكانی سنوورەكانیان كار بۆ خێراتركردنی پرۆسەی دابەشكردنی بكەن، گوتیشی: ئەو كێشانەی دێنە بەردەم پرۆسەكە لە چوارچێوەی ئەو دەسەڵاتانەی بە شارەوانییەكان دراوە چارەسەری بكەن.
وەزیری شارەوانی و گەشتوگوزار وێڕای جەختكردنەوە لەسەر خێراكردنی پرۆسەكە، هاوكات بەپێی ئەو دەسەڵاتانەی لە كۆنووسە پەسەندكراوەكەدا پێی دراوە، ئەویش دەسەڵاتی بە شارەوانییەكان دا بۆ ئەوەی بە هاوئاهەنگی لەگەڵ سەرجەم لایەنە پەیوەندیدارەكان كاری جدی بكەن وەكو كوژاندنەوەی زەی و دانانی نەخشە و دیاریكردنی زەوی و هەروەها دابینكردنی فەرمانبەر و ئەندازیار بۆ ڕاییكردنی كارەكانی دابەشكردنی زەوی.
هەروەها جەختی لەسەر قەرەبووكردنەوەی ئەو كەسانەش كردەوە كە زەوییەكانیان دەكەونە ناو ئەو زەویانەی دابەش دەكرێن.
کۆمێنت (0)
تا ئێستا هیچ کۆمێنتێک نەکراوە.