لە سبەیەوە فۆڕمی دابەشكردنی زەوی بەسەر خانەنشینان دابەش دەكرێت

لە سبەی دووشەممەوە لە ئیدارەی سەربەخۆی گەرمیان دەست دەكرێت بە دابەشكردنی فۆڕمی زەوی بەسەر خانەنشینان، فۆڕمەكەش لە بانكەكان دابەش دەكرێت.

بەڕێوەبەرایەتی خانەنشینی گەرمیان لە ئاگادارییەكدا رایگەیاند: ڕێنمایی دابەشکردنی فۆرمی زەوی بۆ خانەنشینانی سنووری بەڕێوەبەرایەتیمان بەپێی ڕێنمایی وەزارەتی دارایی و ئابووری و بەڕێوەبەرایەتی گشتی خانەنشین لە ڕۆژی دووشەممە رێكەوتی 29/7/2024 فۆرمەکان لە بانکەکان دابەش دەکرێت.

دابەشكردنی فۆڕمەكە بەمشێوەی خوارەوە دەبێت:-

1 - هەر خانەنشینێک لە چ بانکێک مووچە وەردەگرێت، دەبێت سەردانی ئەو بانکە بکات بۆ وەرگرتنی فۆرمەکە.

2 - تەنها خانەنشینی زیندوو دەگرێتەوە کە خۆی فەرمانبەر بووە و خاوەنی مووچەکەیە، خانەنشینی میراتگر مافی وەرگرتنی فۆرمەکەیان نییە.

3 - هەر خانەنشینێک کە كارتی زانیاری ده‌ره‌وه‌ی هه‌رێمه‌ فۆرمی زه‌وی پێ نادرێت.

4 - لەناو بەڕێوەبەرایەتی خانەنشینمان، هیچ فۆرمێک دابەش ناکرێت و پڕناکرێتەوە لەبەرئەوە تکایە کەس سەردانی بەڕێوەبەرایەتیمان نەکات بۆ ئەو مەبەستە.

5 - تەنها فۆرمەکان لەبەڕێوەبەرایەتی خانەنشینمان وەردەگیرێتەوە.

6-  له‌ كاتی وه‌رگرتنه‌وه‌ی فۆرمه‌كان ده‌بێت كۆپی كارتی نشتمانی سه‌رۆك خێزان و خێزانی خانه‌نشین + كارتی زانیاری+ ناسنامه‌ی خانه‌نشینی هاوپێچی فۆرمه‌كه‌ بكرێته‌ له‌یه‌ك وه‌ره‌قه‌دا به ڕه‌نگاوڕه‌نگ (مله‌وه‌ن).

7-  ژن ومێرد ئه‌گه‌ر هه‌ردووكیان خانه‌نشین بوون، هه‌ركه‌سێكیان خاڵی زیاتر بوو ئه‌وه‌یان فۆرمه‌كه‌ پڕبكاته‌وه‌.

8-  خانه‌نشینان ته‌نها ئه‌م خاڵانه‌ پڕبكه‌نه‌وه ‌(ناوی چواری داواكار و ناوی چواری دایك و شوێنی نیشته‌جێ بوون به‌پێی كارتی زانیاری و شوێنی له‌دایك بوون و باری كۆمه‌ڵایه‌تی و ژماره‌ی ئه‌ندامانی خێزان و له‌ خشته‌كه‌ی خواره‌وه‌ ناوی سه‌رۆك خێزان و خێزانه‌كه‌ی بنووسێت).

9-  ئه‌م خاڵانه‌ له‌لایه‌ن به‌ڕێوه‌به‌رایه‌تمانه‌وه‌ پڕده‌كرێته‌وه‌ كار و فه‌رمانگه‌ كه ‌لێی كار ده‌كات و ژماره‌ی ساڵانی خزمه‌ت و پشتگیری به‌رده‌وام له ‌ڕاژه‌.