فڕۆكەخانەی نێودەوڵەتی هەولێر رایگەیاند، گەشتە ئاسمانییەكان لە فڕۆكەخانەیان بەردەوامن و تا ئێستا هیچ كێشەیەكیان نییە، ئەمە لەكاتێكدایە كە لە بەرەبەیانی ئەمرۆ هەینییەوە بەشێكی زۆر لە فڕۆكەخانە گەورەكانی جیهان بەهۆی كێشەی تەكنیكییەوە پەكیان كەوتووە.
فڕۆكەخانەی نێودەوڵەتی هەولێر رایگەیاند: هیچ كێشەیەكمان لە گەشتە ئاسمانییەكان لە فڕۆكەخانەی نێودەوڵەتی هەولێر رووی نەداوە و گەشتەكان بەردەوامن.
لە بەرەبەیانی ئەمڕۆ هەینییەوە بەهۆی دروستبوونی كێشەی پەیوەندی لە كۆمپیوتەر و ئامێرە ئەلیكترۆنییەكان لە سیستەمی ویندۆزی كۆمپانیای مایكڕۆسۆف، بەشێكی زۆری فڕۆكەخانە گەورەكانی جیهان گەشتەكانیان تێدا راوەستاوە.
بەهۆی كێشەكە، ئێستا گەشتە ئاسمانییەكان لە فڕۆكەخانەكانی ئەمەریكا و ئیسپانیا و ئەڵمانیا و زۆرێك لە وڵاتانی دیكەی جیهان راوەستاون و هیچ گەشتێكی ئاسمانییان تێدا ئەنجام نادرێت.
كێشە تەكنیكییەكە تا ئێستا چارەسەر نەكراوە، كۆمپانیای مایكرۆسۆفت ئاماژەی بەوەداوە كە خەریكی بەدواداچوونن بۆ كێشەكە و هەوڵی چارەسەركردن دەدەن.
كێشەكە تەنیا فڕۆكەخانەكانی نەگرتۆتەوە، بەڵكو ئێستا زۆرێك لە دەزگاكانی راگەیاندن و نەخۆشخانە و فرۆشگا و ماركێت و بانك و هێڵەكانی شەمەندەفەریش پەكیان كەوتووە.
کۆمێنت (0)
تا ئێستا هیچ کۆمێنتێک نەکراوە.