بۆ لە نزیکەوە ئاگاداربوون لە ڕووداوی نقومبوونی بەلەمەكەی كەناراوەكانی ئیتاڵیا، حکوومەتی هەرێمی كوردستان بڕیاری دا تێمێک ڕەوانەی ئیتاڵیا بکات.
فەرمانگەی پەیوەندییەكانی دەرەوە رایگەیاند: لەسەر ڕاسپاردەی سەرۆکی حکوومەتی هەرێمی کوردستان ژوورێکی ئۆپەراسیۆن بە بەشداری وەزارەتی ناوخۆ و فەرمانگەی پەیوەندییەکانی دەرەوەی حکوومەت پێکهاتووە بۆ ئەوەی لە نزیکەوە چاودێری بارودۆخ و ئاکامی نقومبوونی بەلەمێکی گواستنەوەی کۆچبەران لە کەناراوەکانی وڵاتی ئیتاڵیا بکات کە بە داخەوە ژمارەیەک هاووڵاتی بوونە قوربانی.
راشیگەیاند: ئەمڕۆ چوارشەممە حکوومەتی هەرێم تیمێکی ڕەوانەی ئیتاڵیا کرد بۆ ئەوەی بە هەماهەنگی لەگەڵ نوێنەرایەتی حکوومەتی هەرێم لەو وڵاتە پەیوەندی بە دامەزراوە فەرمییەکانی ئیتاڵیا بکەن و سەردانی شوێنی ڕووداوەکە لە کەناراوەکانی ئەو وڵاتە بکەن.
هەروەها رایگەیاند: کەسوکاری قوربانیان و هاووڵاتییانی هەرێمی کوردستان دڵنیا دەکەینەوە هەموو هەوڵێک دەخەینە گەڕ بۆ بەدواداچوونی چارەنووسی قوربانیان، هاوکات ئامادەی هەموو هاوکاری و هەماهەنگییەکین لەگەڵ لایەنە پەیوەندارەکان.
فەرمانگەی پەیوەندییەكانی دەرەوە داواشی لە هاووڵاتییان كرد زانیاری و ئاکامەکان دەربارەی ڕووداوەكە تەنیا لە لایەنی فەرمییەوە وەربگرن.
کۆمێنت (0)
تا ئێستا هیچ کۆمێنتێک نەکراوە.