یانەی ریال مەدریدی ئیسپانی بەفەرمی گرێبەستكردنی لەگەڵ كیلیان مباپێ ئەستێرەی فڕەنسی و یاریزانی پێشووی یانەی پاریس سان جێرمان راگەیاند.
مباپێ دوای تەواوبوونی ماوەی گرێبەستەكەی لەگەڵ یانەی پاریس سان جێرمان، بەشێوەی ئازاد وەرزی داهاتوو یاری بۆ یانەی ریال مەدرید دەكات.
ماڵپەڕی یانەی ریال مەدرید رایگەیاند كە لەگەڵ مباپێ لەسەر سەرجەم خاڵەكانی گرێبەستەكەی نێوانیان رێككەوتنیان كردووە.
بەگوێرەی زانیارییەكان گرێبەستەكەی مباپێ لەگەڵ یانەی ریال مەدرید بۆ ماوەی 5 ساڵە و بۆ وەرزی داهاتوو درێسی ژمارە 9ی یانەی شاهانە دەپۆشێت.
یانەی ریال مەدرید ماوەیەكی دوورودرێژە هەوڵی گرێبەستكردن لەگەڵ مباپێ دەدات و یەكەم هەوڵیشی لە ساڵی 2017 بوو كاتێك ئەو یاریزانە فڕەنسییە لە ریزی یانەی مۆناكۆ یاری دەكرد.
بەگوێرەی ئەو زانیارییانەی كە تا ئێستا ئاشكراكراوە مووچەی ساڵانەی مباپێ لەبەرامبەر یاریكردن لە ریزی یانەی ریال مەدرید 15 ملیۆن یۆرۆی سافی دەبێت.
هەر لە گرێبەستەكەی مباپێ لەگەڵ یانەی ریال مەدرید هاتووە كە یاریزانەكە 80%ی مافی وێنەگرتنەكان وەردەگرێت كە ئەمەیان پارەیەكی زۆر و خەیاڵی دەبێت و پێشتر بۆ كریستیانۆ رۆناڵدۆی ئەستێرەی پورتوگالیش نەكرابوو.
کۆمێنت (0)
تا ئێستا هیچ کۆمێنتێک نەکراوە.