ئەمرۆ یەكشەممە بە سەرپەرشتی مەسرور بارزانی سەرۆكی حكوومەتی هەرێمی كوردستان، یەکەمین کۆبوونەوەی ئەنجوومەنی باڵای دەستەی متمانەبەخشین بە دامەزراوەكان و پڕۆگرامەكانی پەروەردە و خوێندنی باڵا لە هەرێمی کوردستان بەڕێوەچوو، لە دوای ئەوەی یاسای ئەنجوومەنی باڵا و پەیڕەوی ناوخۆی کەوتە بواری جێبەجێکردن.
لە كۆبوونەوەكەدا گفتوگۆ لەبارەی ئامانجەکانی ئەنجوومەنەكە كرا کە بریتین لە کارکردن لەپێناوی پاراستنی کوالیتی پەروەردە و خوێندنی باڵا لە هەرێمی کوردستان لە ڕێگەی برەودان بە کولتووری هەڵسەنگاندن بەڕەچاوکردنی میکانیزم و پێوەرە نێودەوڵەتییەکان لە دوای گونجاندنی لەگەڵ بارودۆخی هەرێم بە جۆرێک کە شیاوی جێبەجێکردن بن بە ئاراستەی بەرزکردنەوەی ئاستی پەروەردەیی و زانستیی دامەزراوەکان و پڕۆگرامەکانی خوێندن.
لە سەرەتای کۆبوونەوەکە، ئامانج و هەنگاو و ستاندارد و پلانەکانی دەستەی متمانەبەخشین بە پرۆگرام و ناوەندەکانی خوێندن خرایەڕوو لەبەر ڕۆشنایی پەیڕەوی پەسەندکراوی ئەنجوومەنەکە.
دوای گفتوگۆ و ڕاگۆڕینەوە، ئەنجوومەنی باڵا بڕیاری دا بە پێکهێنانی دەستەی متمانەبەخشین بە دامەزراوەكان و پڕۆگرامەكانی پەروەردە و خوێندنی باڵا لە هەرێمی کوردستان و دەستنیشانکردنی ئەندامەکانی دەستەکە، پاشان ئەمینداری گشتیی دەستەکە دەستنیشان کرا.
دواتریش پلان و ستراتیژ و سیاسەتی کاری دەستەکە پەسەند کرا کە بڕیارە لە دەستپێکی کارەکانی دەستەکەدا چەند زانکۆ و قوتابخانە و ناوەندێکی خوێندنی کەرتی گشتی و کەرتی تایبەتی وەک پڕۆژەی تاقیکاری بخرێتە بەردەم پرۆسەی متمانەبەخشین و جێبەجێکردنی ئامرازەکانی پێداچوونەوە بە گوێرەی پێوەرەکان بۆ دەستەبەری نایابی ئەکادیمی و پەروەردەیی بە پاڵپشتیی هەردوو وەزارەتی پەروەردە و خوێندنی باڵا وتوێژینەوەی زانستی.
کۆمێنت (0)
تا ئێستا هیچ کۆمێنتێک نەکراوە.