شەوی رابردوو هاووڵاتییەكی خەڵكی سۆران كە بە مەبەستی كۆكردنەوەی گژوگیای بەهارە چووبووە كوێستانەكانی سیدەكان، لەوێ لەلایەن ورچێكەوە پەلامار دەدرێت و بریندار دەبێت.
ئەو هاووڵاتییەی ورچەكە هێرشی كردبووە سەر ناوی (شوان كەریم)ـە و تەمەنی 25 ساڵە و دانیشتووی سنووری ئیدارەی سۆرانە.
گەنجەكە ماوەی دوو ڕۆژ بوو بۆ مەبەستی كۆكردنەوەی گژوگیایی بەهارە چووبووە کوێستانەکانی خنێرە و لۆلان لە سنووری شارۆچكەی سیدەکان، بەڵام لە کاتی گەڕانەوەیدا لە شاخەکانی ئەو ناوچەیە ورچێكی تووش دەبێت و هێرشی دەكاتە سەر.
لەبارەی رووداوەكە بەڕێوەبەرایەتی تەندروستی سیدەكان بە (كوردستان تیڤی) راگەیاند: شەوی ڕابردوو هاوولاتییەک بە برینداری گەینرایە بەشی فریاکەوتنی نەخۆشخانەی سیدەکان کە دیاربوو ورچ پەلاماری دابوو.
راشیگەیاند: گەنجەكە قۆلێکی شکا بوو و هەروەها چەند برینێکی دیکەش لە شوێنەکانی دیکەی جەستەیدا هەبوون.
ئاماژەی بەوەش دا كە دوای وەرگرتنی چارەسەری سەرەتایی لە نەخۆشخانەی سیدەکان، گەنجەكە ڕەوانەی ئیدارەی سۆران کرایەوە و لەوێ لە نەخۆشخانەی ئاشتی چارەسەری پێویستی بۆ کرا.
سیدەکان / مەهدی داود
کۆمێنت (0)
تا ئێستا هیچ کۆمێنتێک نەکراوە.