Erbil 15°C سێشەممە 18 حوزەیران 01:12

هەڵمەتی نیشتمانیی سەرتاسەری کوتانی منداڵان دژی نەخۆشی سورێژە بەردەوامە

کوردستان TV
100%


ئەمڕۆ پێنجشه‌ممه‌ 2024.4.25، بەمەبەستی لە نزیکەوە ئاگاداربوون لە چۆنییەتی بەڕێوەچوونی هەڵمەتی نیشتمانی (10) ڕۆژەى كوتان دژی نەخۆشی سورێژە بۆ منداڵانی باخچەی ساوایان و قوتابیانی قۆناغەکانی یەكەم تاكو شەشەمی بنەڕەتی قوتابخانە حکومی و ناحکومییەکان کە ماوەی 6 ڕۆژە لەسەرتاسەری هەرێمی کوردستان و عێراق دەستیپێکردووە، هەریەک لە د. ئالان حمەسەعید، وەزیری پەروەردە و ئومێد خۆشناو، پارێزگارى هەولێر، لە قوتابخانەی شەهید بەهرامی بنەڕەتی تێکەڵاو لە هەولێر، پێشوازییان لە د. ساڵح مەهدی حەسناوی، وەزیری تەندروستی عێراق و د. سامان بەرزنجی، وەزیری تەندروستی حکمەتی هەرێمی کوردستان کرد.

لە بەسەرکردنەوەی هەڵمەتەکەدا، کە هەریەک لە بەڕێوەبەرانی گشتیی پەروەردە و تەندروستیی هەولێر و بەڕێوەبەری پەروەردەی ناوەند ئامادە بوون، وەزیری تەندروستی عێراق، وێڕای دەستخۆشی لە تیمە تەندروستییەکان، خۆشحاڵی خۆشی نیشاندا لە بەرامبەر سەرکەوتنی هەڵمەتەکە لە هەرێمی کوردستان و هەولێری پایتەخت، کە لەماوەی 6 ڕۆژدا لە 95%ـی ئەو قوتابی و منداڵانی هەڵمەتە دەیانگرێتەوە کوتراون.

جێگەى باسە، هەڵمەتەکە کە لەلایەن وەزارەتی تەندروستی هەرێم بە هاوبەشی وەزارەتی تەندروستی عێراق و ڕێكخراوی تەندروستیی جیهانی WHO و ڕێكخراوی یونسێف، بە ئامانجی پته‌وكردنی به‌رگری منداڵان لە تووش بوون بە‌ سورێژه‌ کە نەخۆشییەكی ڤایرۆسی گواستراوەیە لەلایەن چەندین تیم لە کارمەندمانی تەندروستی لە (326) قوتابخانە و باخچەی ساوایانی حکومی و ناحکومی سنووری پارێزگای هەولێر بۆ کۆتانی (114 هەزار) منداڵ بەردەوامە.

تەندروستی

کۆمێنت (0)

تا ئێستا هیچ کۆمێنتێک نەکراوە.

وەڵام بدەوە وەک میوان

دەتەوێت ئاگانامەکان وەربگریت؟
بمێنەوە لەگەڵ نوێترین هەواڵ و ڕووداوەکانمان.