Erbil 15°C پێنجشەممە 30 ئایار 12:10

عێراق: لە بۆردومانەكەی شەوی رابردووی پارێزگای بابل كەسێك كوژراوە

کوردستان TV
100%

شانەی راگەیاندنی ئەمنی عێراق بە فەرمی ژمارەی قوربانییان لە ئەنجامی بۆردومانەكەی شەوی رابردووی بارەگای حەشدی شەعبی لە پارێزگای بابل راگەیاند.

شانەكە لە بەیاننامەیەكدا رایگەیاند: كاتژمێر 01:00ی شەوی رابردوو چەند تەقینەوەیەك لەناو سەربازگەی كالسوو كەوتەوە كە دەكەوێتە باكوری پارێزگای بابل و ئەندامانی پۆلیس و سوپا و حەشدی شەعبی تێدایە.

راشیگەیاند: لە ئەنجامی بۆردومانەكەدا ئەندامێكی دەستەی حەشدی شەعبی كوژراوە و 8ی دیكەش بریندار بوون كە لەنێویاندا سەربازی عێراقی هەن.

هەروەها رایگەیاند: تیمەكانی بەرگریی شارستانی پارێزگای بابل هەرزوو توانیان ئاگری تەقینەوەكان كۆنتڕۆل بكەن و هاوكارییەكان بگەیەنن.

ئاماژەی بەوەش دا كە لیژنەیەكی هونەریی تایبەت لە بەرگریی شارستانی و تیمەكانی تر پێكهێنراوە بۆ دەرخستنی هۆكاری تەقینەوەكان.

شانەی راگەیاندنی ئەمنی جەختیشی كردەوە كە بەگوێرەی بەیاننامەی هێزەكانی هاوپەیمانی نێودەوڵەتی و وەزارەتی بەرگریی ئەمەریكا شەوی رابردوو هیچ چالاكییەكی ئاسمانییان لە پارێزگای بابل نەبووە، هەروەها فەرماندەیی هێزی بەرگریی ئاسمانیش دوای لێكۆڵینەوە و چاودێریكردن، جەختی كردۆتەوە كە لە كاتی تەقینەوەكاندا هیچ درۆن یاخود فڕۆكەیەك لە ئاسمانی پارێزگای بابل نەبووە.

رۆژهه‌ڵاتی ناوه‌راست عێراق

کۆمێنت (0)

تا ئێستا هیچ کۆمێنتێک نەکراوە.

وەڵام بدەوە وەک میوان

دەتەوێت ئاگانامەکان وەربگریت؟
بمێنەوە لەگەڵ نوێترین هەواڵ و ڕووداوەکانمان.