لەچوارچێوەی ئامادەكارییەكان بۆ رۆژانی جەژنی رەمەزانی پیرۆز، بڕیاردراوە تیمە تەندروستیەكانی پارێزگای سلێمانی لەناو بازاڕ و شوێنە گەشتیارییەكان جێگیر بكرێن.
تەندروستی سلێمانی بڵاوی كردەوە: لەچوارچێوەی ئامادەكارییەكان بۆ پێشوازیكردن لە جەژنی ڕەمەزانی پیرۆز، پلان بۆ ڕۆژانی پێش جەژن و ڕۆژانی جەژن دانراوە كە تیمی تەندروستییەكان لە ناو بازاڕەكان و شوێنە گەشتیارەكان و ناوچە جیاجیاكان جێگیر بكرێن.
بڵاویشی كردەوە: بەپێی پلانەكە ڕۆژانی پێش جەژن تیمی تەندروستی لەبەردەركی سەرا و كاسۆمۆڵ لە كاتژمێر 9ی بەیانی تاوەكو 10ی شەو دادەنرێت.
هەروەها بڵاوی كردەوە: یەكەم ڕۆژی جەژن 8 تیمی تەندروستی لە سەرقەبران و پاركی ئازادی و شەقامی سالم و چاڤی لاند و پاركی هەواری شار دادەنرێت، دووەم ڕۆژی جەژن 9 تیمی تەندروستی لە پاركی ئازادی و سەرچنار لە كاتژمێر 2ی نیوەڕۆ تاوەكو درەنگانێكی شەو دادەنرێت، سێیەم رۆژی جەژنیش 4 تیمی تەندروستی لە پاركی ئازادی و سەرچنار و پاركی ئازادی و چاڤی لاند دادەنرێت.
بەڕێوەبەرایەتی تەندروستی سلێمانی بڵاویشی كردەوە: لە ڕۆژانی جەژنی ڕەمەزانی پیرۆز لەسەرجەم شوێنە گەشتیارییەكان و بنكە و مەڵبەندە تەندروستییەكانی دەرەوەی شار، تیمی تەندروستی تەرخانكراوە بۆ ئەوەی خزمەتگوزاریی تەندروستی پێشكەشی هاووڵاتییان بكەن.
هەروەها هاووڵاتییانیش دەتوانن لە كاتی پێویست و ڕوودانی هەر ڕووداوێكی نەخوازراو پەیوەندی بكەن بە سەنتەری خێرای فریاكەوتنی ژمارە (122) بۆ ئەوەی تیمەكانی تەندروستی بەهانایانەوە بچن.
کۆمێنت (0)
تا ئێستا هیچ کۆمێنتێک نەکراوە.