نووسینگەی راگەیاندنی وەزیری ھەرێم بۆ کاروباری پێکھاتەکان ئەمڕۆ پێنجشەم روونكردنەوەیەكی لەبارەی كەسێك بڵاو كردەوە و رایگەیاند كە هێرشی بێ بنەما و رەگەزپەرستانەی ئاراستەی پێكهاتەیەكی توركمان كردووە.
نووسینگەی راگەیاندنی وەزیری هەرێم لە روونكردنەوەكەدا رایگەیاند: جێگای داخە کەسێک بەناوی (فەرھاد سەنگاوی) لە کۆنگرەیەکی ڕۆژنامەگەری ھێرشی بێ بنەما و ڕەگەزپەرستانە و دوور لە ڕاستی دەکاتە سەر پێکھاتەیەکی ڕەسەنی وەک تورکمان.
راشیگەیاند: لێدوانی کەسانی نابەرپرس و قین لە دڵ، لەمبارەوە نرخێکی ئەوتۆی نییە، شاراوە نییە كە سەرچاوەی ئەو دەنگۆیانە ناسراو و ئامانجەكانیان ئاشكران و ڕەفتارێكی تێکدەرانەن، وەك چۆن لە ڕێگەیانەوە پشێوی و نادروستی لە كۆمەڵگە و دامەزراوەكانی دروست دەكەن.
هەروەها رایگەیاند: داوا لە دەزگاكانی ڕاگەیاندن دەکەین وردبین بن و سەرنجیان ڕادەكێشین بۆ پێویستی پشتڕاستكردنەوەی ڕاستی هەواڵەكان پێش بڵاوكردنەوەیان و پابەندبوون بە ستانداردەكانی متمانەپێكردن و پیشەیی بوون لە بڵاوكردنەوەدا، چونکە ئەو جۆرە گوتارانە زیان بە پێکەوەژیان و ئاشتی کۆمەڵایەتی دەگەیەنێت و تەنھا ئامانجی تێکدانی ڕەوشەکەیە.
کۆمێنت (0)
تا ئێستا هیچ کۆمێنتێک نەکراوە.