ئاسایشی خەلیفان دەستگیركردنی چەند تۆمەتبارێكی راگەیاند كە هەڵساون بە فێڵكردن لە هاووڵاتییان.
بەڕێوەبەرایەتی ئاسایشی خەلیفان رایگەیاند: رۆژی یەكشەمی رابردوو 6 کەس بە تۆمەتی فێڵکردن لە هاووڵاتییان دەستگیرکران، تۆمەتبارەکان لە ڕێگەی بەخشینی سیمکارتی (زین) و پێدانی بڕی 20 هەزار دینار بە هەر کەسێکی وەرگریی سیمکارتەکە هەڵساون بە وێنەگرتنی کارتی نیشتمانی و وێنەی کەسی هاووڵاتییان، لەو رێگەیەوە هەژماری بانکی نهێنییان دروستکردووە.
راشیگەیاند: تۆمەتبارەكان لەو رێگەیەوە پارەیەکی زۆریان خستۆتە سەر ئەم هەژمارە بانکییانە و بەرەو دەرەوەی وڵاتیان بردووە بە مەبەستی کڕینی دۆڵار بە نرخێکی کەمتر لە عێراق و دواتر هێنانەوە بۆ هەرێمی کوردستان بە ئامانجی فرۆشتنی بە نرخێکی زیاتر.
ئاسایشی خەلیفان هەروەها رایگەیاند: پەڕاوی لێکۆلینەوە بۆ تۆمەتبارەكان کراوەتەوە و ڕەوانەی دادگا کراون.
داواشی لە هاووڵاتییان كرد هۆشیار بن بەرامبەر ئەم جۆرە فێلانە، چونکە لەوانەیە پێدانی کارتی نیشتمانی و وێنەی خۆیان بۆ چەندین کاری مەترسیدارتر بە کاربهێنرێت و ئەگەری هەیە لە داهاتوودا زیانێکی زۆر لەو خاوەن هەژمارە بانکییانە بدات و باج و رسووماتی بانکی بکەوێتە سەریان.
کۆمێنت (0)
تا ئێستا هیچ کۆمێنتێک نەکراوە.