لیژنەی هونەری ناوبژیوانانی خولی ئیسپانیا سزای ئەو ناوبژیوانەی دیاری كرد كە لە یارییەكەی نێوان ریال مەدرید و ڤالێنسیا هەڵەیەكی كوشندەی ئەنجام دا.
هەردوو یانەی ریال مەدرید و ڤالێنسیا رۆژی شەممەی رابردوو لە گەڕی 27ی خولی ئیسپانیا بە ئەنجامی 2-2 گۆڵ یەكسان بوون.
لە یارییەكەدا ناوبژیوانی ئیسپانی جیل مانزانۆ هەڵەیەكی كوشندەی ئەنجام دا كاتێك لە خولەكانی كۆتایی گێمی دووەمدا بەر لە تۆماركردنی گۆڵێك لەلایەن بلینگهام هێرشبەری یانەی ریال مەدرید، فیكەی كۆتایی یارییەكەی لێ دا و گۆڵەكەی بۆ یانەی شاهانە هەژمار نەكرد.
تۆڕی هەواڵی (دیڤنسا سەنتڕال)ی ئیسپانی بڵاوی كردەوە: لیژنەی هونەری ناوبژیوانان بە مانزانۆی راگەیاندووە كە بەهۆی هەڵەكەوە بەلایەنی كەم لە دوو یاریی داهاتوودا سڕ دەكرێت.
بڵاویشی كردەوە كە مانزانۆ خۆی دانی بە هەڵەكە داناوە و ئامادەیی خۆشی بۆ هەر سزایەك نیشانداوە.
یانەی ریال مەدرید بەهۆی ئەم یەكسانبوونە خاڵەكانی بۆ 66 خاڵ بەرزكردەوە و هەر لە پێشەنگی یانەكان مایەوە، دوای ئەویش یانەی گیرۆنا دێت بە كۆكردنەوەی 59 خاڵ و لە ریزبەندی سێیەمیش یانەی بەرشەلۆنە دێت بە 58 خاڵ.
کۆمێنت (0)
تا ئێستا هیچ کۆمێنتێک نەکراوە.