ئەمشەو یەكشەم لە ئەنجامی شەڕی نێوان دوو عەشیرەتدا لە سنووری پارێزگەی زیقاڕ، ئەفسەرێكی باڵای عێراق كوژراوە.
میدیاكانی عێراق بڵاویان كردەوە: ئەمشەو شەڕ و پێكدادانی توند بە بەكارهێنانی چەكی قورس و مامناوەند لەنێوان دوو عەشیرەتدا لە شارۆچكەی ئیسلاح لە پارێزگەی زیقاڕ دروستبووە.
گرژی و ئاڵۆزی نێوان دوو عەشیرەتەكە لە شەوی ڕابردووەوە دروستبووە و ئەمشەویش كار گەیشتۆتە بەكارهێنانی چەك لەنێوانیاندا.
بە مەبەستی كۆنتڕۆڵكردنی بارودۆخەكەش، هێزێكی زۆری ئەمنی و پۆلیس گەیشتوونەتە شوێنی شەڕ و ئاڵۆزییەكە.
لە كاتی هەوڵی نێوەندگیری و ڕاوەستانی شەڕەكەدا، گولـلەیەك بەر عەمید عەزیز بەڕێوەبەری هەواڵگری پارێزگای زیقاڕ كەتووە و كوژراوە.
هەردوو عەشیرەتەكە پێشتر كێشە لەنێوانیاندا هەبووە و سوڵحیان كردووە، بەڵام لە شەوی ڕابردووەوە كێشەكە سەری هەڵداوەتەوە و تا ئامادەكردنی ئەم هەواڵە، شەڕ و رووبەڕووبوونەوەكان لەنێوان هەردوولا بەردەوامیان هەیە.
کۆمێنت (0)
تا ئێستا هیچ کۆمێنتێک نەکراوە.