نێچیرڤان بارزانی و دوو گرووپی پەرلەمانتارانی ئەڵمانی كۆبوونەوە

هەر لە بەردەوامیی دیدار و كۆبوونەوەكانیدا لە كۆنفرانسی ئاساییشی میونشن لە ئەڵمانیا، پێشنیوەڕۆی ئەمڕۆ شەممە 2024/2/17 نێچیرڤان بارزانی، سەرۆكی هەرێمی كوردستان، بە جیا لەگەڵ گرووپێكی پەرلەمانتارانی حزبی SPD و گرووپێكی دیكەی هەردوو حزبی CDU و CSUی ئەڵمانی، پەیوەندییەكانی ئەڵمانیا لەگەڵ عێراق و هەرێمی كوردستان و دۆخی ناوچەكەیان تاوتوێ كرد.
پەرلەمانتاران دید و تێڕوانینی خۆیان بۆ چۆنیەتیی برەودان بە پەیوەندییەكانی ئەڵمانیا لەگەڵ عێراق و بەتایبەتی هەرێمی كوردستان و داهاتووی هاریكاریی هاوبەشی نێوانیان لە كەرتە جیاكاندا خستەڕوو، هەروەها سوپاسی ڕۆڵی هەرێمی كوردستانیان كرد لە بەرنگاربوونەوەی تیرۆر و یارمەتیدانی پێكهاتەكان بەتایبەتیش ئێزدییان.
لای خۆیەوە نێچیرڤان بارزانی، سوپاسی پشتگیرییەكانی پەرلەمان و حكوومەت و گەلی ئەڵمانیای بۆ هەرێمی كوردستان كرد و بەتایبەتی ئاماژەی بە هاوكاری و یارمەتییەكانی ئەڵمانیا بۆ ئێزدییان كرد.
دۆخی پێكهاتەكان بەگشتی لە هەرێمی كوردستان، تەوەرێكی دیكەی كۆبوونەوەكە بوو