ئەمریكاو بەریتانیا بەهاوكاری چەند وڵاتێكی دیكە هێرشیان كردە سەر حوسییەكانی یەمەن

لۆید ئۆستین، وەزیری بەرگری ئەمریكا، دەستپێكردنی هەڵكوتانە سەر شوێنەكانی ژێر دەسەڵاتی گرووپی حوسییەكان لە یەمەن پشتڕاستكردەوە.
ئۆستین ڕایگەیاند كە سوپای ئەمریكا و بەریتانیا بە هەماهەنگی لەگەڵ ئوسترالیا، بەحرەین، كەنەدا، دانیمارك، هۆڵەندا و نیوزلەندا هەڵمەتەكانیان ئەنجامداوە.
وەزیری ئەمەریكا لە بەیاننامەیەكدا ئاماژەی بەوەدا كە هێرشەكان "ئامانجیان زیاتر پەكخستن و كەمكردنەوەی تواناكانی میلیشیای حوسییەكانە كە لەلایەن ئێرانەوە پاڵپشتی دەكرێن .
ئۆستین ئاماژەی بەوەشكردووە، هێزەكانی هاوپەیمانان 36 ئامانجی حوسییەكانیان لە 13 شوێن بۆردومانكردووە كە پەیوەندییان بە دامەزراوەی هەڵگرتنی چەك و سیستەمی مووشەكی و لانچەر و سیستەمی بەرگری ئاسمانی و ڕادارەكانی حوسییەكانەوە هەیە .
ئۆستین جەختی لەوە كردەوە كە ئەم كارە هاوبەشە "پەیامێكی ڕوون بۆ حوسییەكان دەنێرێت كە ئەگەر كۆتایی بە هێرشە نایاساییەكانیان نەهێنن بۆ سەر كەشتییە نێودەوڵەتییەكان و كەشتییە دەریاییەكان، ڕووبەڕووی لێكەوتەی زیاتر دەبنەوە".
هەروەها گوتیشی: ئێمە درێغی ناكەین لە بەرگریكردن لە ژیانمان و ئازادی بازرگانی لە یەكێك لە گرنگترین ڕێڕەوی ئاوی جیهان.