لە سنووری قەزای خەلیفان چەند پڕۆژەیەکی خزمەتگوزاری جێ بەجێ دەکرێن

چەند پرۆژەیەکی خزمەتگوزاری لە سنووری قەزای خەلیفان لە ئیدارەی سەربەخۆی سۆران جێ بەجێ دەکرێن.

بە بڕی زیاتر لە 397 ملیۆن دینار، کۆڵان و شەقامەکانی گەڕەکی شەهیدان، لە قەزای خەلیفان قیرتاو و کۆنکرێت کران.

میدیا ئیسماعیل، ئەندازیاری پرۆژەکە، بە فەرمانگەی میدیا و زانیاریی ڕاگەیاند: پرۆژەی قیرتاوکردن و کۆنکرێت کردنی شەقامەکانی گەڕەکی شەهیدان لە خەلیفان، لە قۆناخی کۆتاییدایە، کە بە گوژمەی 397 ملیۆن و 275 هەزار دینار جێبەجێ کراوە.

بەشێک لە هاووڵاتییانی ناوچەکە، لەبارەی پرۆژەکەوە دڵخۆشیی خۆیان بۆ فەرمانگەی میدیا و زانیاری دەربڕیوە و پێیان وایە پرۆژەکە خزمەتێکی باش بە هاتووچۆی هاووڵاتییان دەکات.

هەروەها لە سنووری شارەدێی سرێشمە چەند پڕۆژەیەکی خزمەتگوزاری لە ناوچەکە بەم شێوەیە جێ بەجێ دەکرێن:
1- پڕۆژەیەک بۆ ڕووناکی شەقامی سەرەکی سرێشمە- خەلیفان، بە گوژمەی 117 ملیۆن دینار.
2- نۆژەنکردنەوە و قیڕتاوکردنی ڕێگای گوندی لێرە میر لە سنوورەکەدا، بە گوژمەی 120 ملیۆن دینار.
3- دروست کردنی شۆستە بۆ ڕێگای سەرەکی سرێشمە بە درێژایی 500 مەتر، بە گوژمەی 74 ملیۆن دینار.
4- دروستکردنی پارکێک لە سرێشمەدا، بە گوژمەی 38 ملیۆن دینار.
لە لێدوانێکیدا سۆران شێرزاد سەرۆکی شارەوانی سرێشمە بە ماڵپەڕی کوردستان تیڤی ڕاگەیاند، لە سەرەتاکانی ساڵی نوێدا بنکەیەکی تەندروستی و قوتابخانەیەکی شەش پۆلی، بۆ سرێشمە دروست دەکرێت.
گوتیشی، بە سوپاسەوە سوپاسی کابینەی نۆیەمی حکومەت دەکەین کە بێ جیاوازی خزمەتگوزاری دەگەێنێتە تەواوی شار و شارۆچکە و ناوچەکانی هەرێمی کوردستان بۆ خزمەتی هاووڵاتییان.

کابینەی نۆیەم، لە چوار ساڵی پێشووی خۆیدا، تەنیا لە بواری ڕێگە و گواستنەوەدا زیاتر لە 997 پڕۆژە و لە بواری ژێرخان و خزمەتگوزاری یش زیاتر لە 427 پرۆژەی لە هەرێمی کوردستان جێبەجێ کردووە.

سەرباری بەردەوامیی قەیرانی دارایی، پرۆژەکانی ئاوەدانکردنەوەی شار و شارۆچکەکان بەردەوام بووە و بۆ ئەو مەبەستەش هەوڵەکانی کابینەی نۆیەم بەردەوام دەبن.