ئەمڕۆ یەكشەممە 11/19 مەسرور بارزانی، سەرۆكی حكومەتی هەرێمی كوردستان، بەردی بناخەی پڕۆژەی ناوچەی پیشەسازی و كارگەی ریسایكلینی زبڵ و خاشاكی لە ناحیەی رزگاری لە سنووری ئیدارەی سەربەخۆی زاخۆ دانا.
لە ڕێورەسمەكەدا ، سەرۆكی حكومەت لە گوتارێكدا ئاماژەی بەوەدا كە ئەم پڕۆژانە هەلی كار بۆ هەزاران كەس دەرەخسێنێت و كاریگەریی لە سەر گەشەپێدانی ئابووری هەرێمی كوردستان دەبێت .
ئەمەش دەقی گوتاری سەرۆكی حكومەتی هەرێمی كوردستانە:
بناڤێ خودێ مەزن و دلۆڤان
خۆشحالم، كو جارەكا دیش هاتینەڤە باژێڕێ زاخۆكا دەلال و لگەڵ هنگۆ یێت خۆشتەڤی یێ پشكدارم ل دانانا بەرێ بنیاتی بۆ دو پڕۆژێت گرنگ، كو پێك دهێن ل ناڤچەیا پێشەسازی ل زاخۆ و كارگەیا لێكجوداكرنا گلێشی ( Recycling)، كو هەردو پڕۆژە گەلەك دگرنگ و ستراتیجینە و دێ مفایەكێ زۆر گەهیننە ئەڤێ دەڤەرێ. دەستخۆشیێ ل كۆمپانیایێن یا جی ب جیكار دكەم و هیڤیدارم ب رەنگەكێ باش ئەڤ دوو پرۆژە بێنە ئەنجامدان.
مە ل ساڵێن رابۆری، كار كر داكو پڕۆژەیێت هۆ وەكی ناڤچەیا پێشەسازی ل باژێڕ و پارێزگەهێت دیش یێت كوردستانێ هەبن. ئەڤ پڕۆژە فورسەت و دەلیڤێت كاری بۆ سەدان بەلكی هزاران كەسان ل كوردستانێ دابین دكەن و ئابووریا هەرێما كوردستانێش دێ بەرەڤ پێش بەت.
پێشڤەبرنا كەرتێ پێشەسازی لگەل كەرتێت دی، دێ كاریگەریەكا دیار ل سەر پێشڤەچوونا كوردستانێ هەبیت.
ئەڤرۆ ل دونیایێ، ئەو وەلات ب پێشكەڤتی دهێنە زانین، كو ل روی یێ پێشەسازیێ ڤە د پێشكەڤتی بن و داهێنانێ د بەرهەمئینانا پێدڤیێت ژیانا مرۆڤی دا دكەن.
خۆشبەختییە، كو هەرێما كوردستانێ دەڤەرەكا زەنگینە د بیاڤێ كەرستێت خاڤ و سامانێت سروشتی، كو بنیاتەكێ سەرەكی یێ گەشەكرنا كەرتێ پێشەسازیێ یە. بازاڕێ كوردستانێش، بازاڕەكێ نوی و پێگەهشتی یە و
پێدڤی ب هەر كەل و پەلەكی هەیە، كو دڤێت ئەم كار ل سەر بكەین بۆ دەستەبەركرنا پێداویستیێت مە یێن ناڤخۆیا كوردستانێ و ئینانا كەل و پەلان ل دەرڤە یا سنووردار بیت و بێتە كێمكرن.
بۆ پێشئێخستنا كەرتێت ئابووری، مە پێدڤی ب پێكڤەگرێدانا بازاڕێت كوردستانێ هەیە، ئەڤەش دێ ب رێكا هەبوونا رێكوبانێت باش هێتە كرن داكو هاتن و چوونێ ب ساناهی بێخن و وەختیش دێ كورت كەن و دەرئەنجام دێ تێچوویێت داراییش بۆ خودان كاران كێم بن. مە ل ساڵێت رابری ل سەر ڤی لایەنیش كارێ كری و نۆكە ئەو رێكوبانێت د ناڤبەرا باژێڕان دا پێشكەفتنەكا باش یا ب خۆڤە دیتی و وەختێ دناڤبەرا باژێڕ و پارێزگەیان گەلەك ل بەری نۆكە یێ كێمتر بووی.
پرۆژەیەكێ دی یێ گرنگ بۆ ئەڤرۆ، كارگەیا ریسایكلینا گلێشی و زبڵی یە. ئەڤ پرۆژەش، ژ بلی كو دێ دەلیڤێت كاری بۆ سەدان كەسان پەیداكەت، چەند مفایێت گرنگ یێت دی، دێ هەبن ل وانا پاراستنا ژینگەیێ و سەرۆكانیێت سروشتی و پارێزگاریكرنا پاقژی و بژوینی یا ئەردی.
جودا ل لایەنێ ساخلەمیش، ل ناڤبرنا گلێشی و زبڵی ب ڤی شێوەیێ نۆكە و سوتنا وی یان بنئاخكرنا زبڵ و گلێشی، گەلەك جارا دبیتە ئەگەرێ بەڵاڤبوینا چەندین نەخۆشیاش ل دەڤەرێ. چونكی هەبوونا پاشڤەمایێت گلێش و زبڵ و بەرمایكا، مەترسی و گەفەكا زۆرا مەزنە ل سەر ژینگەیێ و پیسبوونا ئاخێ و ئاڤا ژێرئەردی، كو ل دویماهیێ دێ كاریگەریەكا خراپ ل سەر ژیانا مرۆڤی هەبیت. لەوا پرۆژێ ریسایكلینا گلێشی، پرۆژەیەكێ گەڵەك گرنگە و ئەم دێ كاركەین، كو ل هەمی ناڤچە و دەڤەرێت كوردستانێ پرۆەژێت ب ڤی رەنگی بێنە ئەنجامدان.
ئەڤرۆ بابەتێ ژینگەپارێزیێ و پاراستنا سەرۆكانیێت سروشتی و سەخبێریكرنا وان ب رەنگەكێ زانستی، ئێكە ل پرسێت جیهانی و ل وان كێشەیێت مەزنە، كو روی ب روی مرۆڤایەتیێ بووینە و ئەم ل هەرێما
كوردستانێ ل ڤێ كێشێ و ئاستەنگێت وێ د دویر نینە، لەوا پێدڤی یە هەمی ئامادەكاریان بكەین بۆ روی ب روی بوونا ڤان ئاستەنگان.
جهێ سوپاسێیە كو خودێی فرسەت دایە مە كو مە پێ چێ ببیت كو ئەو بەڵێنێت مە دای گەلەت ل وان ببنە كردار و ببنە پرۆژە. سەرەڕای ئەو هەموو قەیران و ئاستەنگێت بۆ ڤێ كابینێ هاتینە درستكرن . سوپاس بۆ خودێ بێنفرەهیا هنگۆ و ب پشتەڤانیا كەرتێ تایبەت و ب ماندیبونا و دلسۆزیا فەرمانبەرێت حكومەتێ ل كەرتێ گشتی . ئەڤ كابنەیە نە كەفت بەلكی ڕۆژ ب ڕۆژ بەرەڤ سەركەفتنێ پێنگاڤ هاڤێتن و ئینشاڵلا خودێ فرسەتێ بدەتە مە دێ پێنگاڤێت باشتر و سەركەفتنێت مەزنتریش ب دەست ئینین و ئو مە وان ماوەیێت چۆی وەختێ گەلەك پێشكەفتن د وارێت كشتوكالی و پیشەسازێیدا هەبووی و مە ل بەرە ئەڤ دەستپێكا بووژانەوا ئابووری وپێشخستنا كەرتێ كشتوكالی و پیشەسازی ببیتە شۆڕەشەكا بووژانەوا ئابووریێ ل هەموو باژێڕ و پارێزگەهێت كوردستانێ.
هیڤیا مە ئەوە هەموو لایەنێت سیاسیت ناڤخۆ و هەموو دۆستێت مە ل دەرڤەش پشتیڤانێت بەرنامێت حكومەتی بن بۆ هندێ مە پێچێ ببیت خزمەتگوزاریێت زێدەتر بۆ خەلكێ هەرێما كوردستانێ دەستەبەر بكەین.
جارەكا دیش دەستخۆشیێ ل كومپانیێت جیبەجیكارێت ڤی پرۆژەی دكەم. هیڤیدارم ب كوالیتیەكا باش ئەڤ پرۆژە بێتە جێ ب جێ كرن و خەلكێ زاخۆ و دەورروبەرێت دهۆكێ وهەمی كوردستان مفای لێ ببینن.
هون بمینن ب خێر و سەلامەتی و كوردستان هەر ئاڤەدان بیت.
کۆمێنت (0)
تا ئێستا هیچ کۆمێنتێک نەکراوە.