شەپۆلێكی باران بارینی بەخوڕ ناوچەكەمان دەگرێتەوە

ئەگەری بارینی بەفر لەسەنتەری حاجی ئۆمەران ئەو ناوچە شاخاویانە دەبێت كە بەرزیان لە 1800 مەتر لە ئاستی ڕووی دەریاوە زیاترە.
ئاراس جەبار،شارەزای بواری كەشناسی رایگەیاند: لە نیوەرۆی سبەی یەكشەمەوە 19/11/2023 لەئەنجامی نزیكبوونەوەی كاریگەری نزمەپاڵەپەستۆكەی دەریای ناوەراست خێرایی با لە زۆربەی ناوچەكاندا مامناوەند چالاك ئەبێت بەخێرای 15-30كم/ك لە ئاراستەی باشوری رۆژھەڵاتەوە . هەروەها گوتی: لەكاتەكانی ئێوارەی سبەیدا كاریگەری سەرەتایی شەپۆلەكە لەسەر ناوچەكانمان دەستپێدەكات بەشێوەی بارانی مامناوەند و لەكاتەكانی شەودا چالاكتر ئەبێت بۆ بارانی بەردەوام و بەخوڕ لەگەڵ ڕوودانی ھەورە بروسكە لە زۆربەی ناوچەكاندا ھاوكات خێرایی با لەكاتی باران ناوبەناو چالاكتر ئەبێت لەنێوان 20-45كم/.
گوتیشی:لە كاتە جیاوازەكانی رۆژی دووشەمە 20/11/2023 چەقی بەھێزی چڕی بارانەكە ئەبێت لەسەر سەرجەم ناوچەكان بەشێوەی بەردەوام و ھەندێك كات ئاستی بارانەكە بەخوڕ ئەبێت لەگەڵ ڕوودانی ھەورە بروسكە و ھەندێ ناوچەش تەرزە بارین ئەبێت ، بەھۆی كاریگەری ئەو بارستە ھەوای ساردەی لەگەڵ ئەو نزمەپاڵەپەستۆیە ناوچەكە دەگرێتەوە ھەر لە رۆژی دووشەمە پلەكانی گەرما بەرێژەی 4 تا 6 پلە بەڕاورد بە ئەمڕۆ وسبەی نزمتر ئەبێتەوە و كەشێكی سارد دروست ئەبێت لەگەڵ بارینی بەفر لەناوچە شاخاویە بەرزەكاندا .
ئاماژەی بەوەشدا لە نێوان ئێوارەی دووشەم بۆ بەرەبەیانی سێشەمە 21/11/2023 بەھۆی زیاتر نزمبوونەوەی پلەكانی گەرما و بەردەوامی شەپۆلەكە ئەگەری بارینی بەفر لەسەنتەری حاجی ئۆمەران ئەو ناوچە شاخاویانە ئەبێت كە بەرزیان زیاتر لە 1800 مەتر لە ئاستی ڕووی دەریا ، بەگشتی كاریگەری ئەم شەپۆلە تا نیوەرۆی سێشەمە بەردەوامی ئەبێت و دواتر كەشەكە سەقامگیر ئەبێتەوە .
روونیشیكردەوە،لەماوەی درەنگانی سبەی شەو تا ئێوارەی دووشەمە كە چەقی ئەم شەپۆلەیە ئەگەری دروستبوونی لافاو ئەبێت بەتایبەتیش لەسەنتەری پارێزگای ھەولێر و دەوروبەری ، سنوری ئیدارەی سۆران و سنوری قەزای ئاكرێ و ئامێدی ، بادینان بەگشتی پێشبینی زۆرترین رێژەی بارانبارین لەو ناوچانەدا دەكرێت كە رێژەكەی لەنێوان 60 تا زیاتر لە 100 ملیممەترە ، لە سەرتاسەری ناوچەكانیشدا رێژەی باران لەسەروو 40 بۆ 50 ملیممەتر چاوەروان دەكرێت تا نزیك 100 ملیممەتر ، لەناوچەكانی دیكەشدا سنوری پارێزگای سلێمانی و كەركوك و دھۆك و ئیدارەی راپەرین ئەگەری بەرزبوونەوەی ئاستی ئاو و دروستبوونی ئاستەنگی ھاتوچۆ ئەبێت لەسەر ناوچە نزمەكان ئەو شوێنانەی رێرەوی ئاوی باراناویان پێدا تێپەردەبێت یان كۆدەبێتەوە ، لەماوەی ئەم بارانەدا ھەموو شوێنەكان پەڵەدانیان مسۆگەرە و بارانێكی بە رەحمەت ئەبێت و دوور ئەبێت لەڕوودانی كارەسات و زیان .