وه‌زیری به‌رگریی ئیسڕائیل ئه‌مڕۆ یه‌كشه‌م شێوازی هێرشی زه‌مینی سوپای وڵاته‌كه‌ی بۆ سه‌ر كه‌رتی غه‌ززه خسته‌ڕوو و تێیدا ئاماژه‌ی به‌وه دا كه ڕه‌نگه هێرشه‌كه چه‌ند مانگێك بخایه‌نێت.
یوئاف گالانت وه‌زیری به‌رگریی ئیسڕائیل له‌میانه‌ی چاوپێكه‌وتنێكدا له‌گه‌ڵ سه‌ربازانی وڵاته‌كه‌ی گوتی: ڕه‌نگه هێرشی زه‌مینی بۆ سه‌ر كه‌رتی غه‌ززه مانگێك یا دوو مانگ یاخود سێ مانگ بخایه‌نێ، به‌ڵام له كۆتایی هێرشه‌كه‌دا شتێك بوونی نامێنێ به‌ناوی بزووتنه‌وه‌ی حه‌ماس.
گوتیشی: به‌ر له‌وه‌ی تانك و زریپۆشه‌كانمان ده‌ست به هێرشی زه‌مینی بكه‌ن، هێرشی ئاسمانی بۆ سه‌ر بنكه و خاڵه‌كانی دوژمن ده‌كه‌ین كه به‌شێوه‌یه‌كی كوشنده و ورد و كوالێتی ئه‌نجام ده‌درێن.
یوئاف گالانت وه‌زیری به‌رگریی ئیسڕائیل پێشتریش هه‌ر له‌باره‌ی پڕۆسه‌ی هێرشی زه‌مینی بۆ سه‌ر غه‌ززه، رۆژی هه‌ینی ڕابردوو ڕایگه‌یاندبوو كه هێرشه‌كه‌یان به 3 قۆناغ ئه‌نجام ده‌ده‌ن و ئامانجی سه‌ره‌كیشیان بنبڕكردنی یه‌كجاری بزووتنه‌وه‌ی حه‌ماس و دانانی سیسته‌مێكی نوێیه بۆ كه‌رتی غه‌ززه.
ئه‌مڕۆ یه‌كشه‌م شه‌ڕ و پێكدادانه‌كانی سوپای ئیسڕائیل و گرووپه چه‌كداره‌كانی فه‌ڵه‌ستین پێ ده‌نێته رۆژی 16 و تا ئێستاش له هه‌ردوولا سه‌دان كه‌س كوژراون و هه‌زارانی دیكه‌ش بریندار بوون.
کۆمێنت (0)
تا ئێستا هیچ کۆمێنتێک نەکراوە.