له‌میانه‌ی كۆبوونه‌وه‌یه‌كدا بەرپرسی دەستەی کارگێڕیی مەکتەبی سیاسیی پارتی دیموکراتی کوردستان و كوسنوڵی توركیا جه‌ختیان كرده‌وه كه پێویسته كێشه‌كانی نێوان هه‌ولێر و به‌غدا له ڕێگه‌ی ده‌ستوور و به دیالۆك چاره‌سه‌ر بكرێن.
ئەمڕۆ دووشه‌م لە بارەگای مەکتەبی سیاسی، فازڵ میرانی بەرپرسی دەستەی کارگێڕیی مەکتەبی سیاسیی پارتی دیموکراتی کوردستان پێشوازی لە مه‌مه‌د مه‌ولوود یاكوت کونسوڵی گشتیی تورکیا لە ھەرێمی کوردستان و شاندی یاوه‌ری کرد.
لە دیداره‌كه‌دا وێڕای بەخێرھێنانی میوان، گفتوگۆ له‌باره‌ی دوایین پێشهاته‌كان و دۆخی گشتی عێراق و ناوچه‌كه و پێویستی چاره‌سه‌ركردنی كێشه‌كانی هه‌ریمی كوردستان و حكوومه‌تی فیدڕال به پابه‌ندبوون به ده‌ستوور و له ڕێگه‌ی دیالۆگ كرا.
میرانی ئاماژه‌ی به‌وه كرد كه پێویسته مافی گشت پێكهاته‌كانی عێراق پارێزراو بێت و جه‌ختیشی كرده‌وه كه سه‌قامگیری ئه‌من و ئاسایش له ناوچه‌كه له خزمه‌تی هه‌موو لایه‌ك دایه.
لای خۆشییه‌وه کونسوڵی گشتی تورکیا سوپاسی مه‌كته‌بی سیاسی كرد بۆ ئه‌م دیداره و ھیوای خواست بتوانێت برەو بە پەیوەندییەکانی وڵاتەکەی لەگەڵ ھەرێمی کوردستان بدات، بەتایبەتی لەو بوارانەدا کە بۆ ھەردوولا گرینگن.
دواتر پرۆسەی ھەڵبژاردنی پەرلەمانی کوردستان و په‌یوه‌ندییه‌كانی نێوان پارتی دیموكراتی كوردستان و یه‌كێتی نیشتمانی كوردستان تاوتوێ كران و جه‌ختیش له‌وه كرایه‌وه كه پێویسته ئه‌م په‌یوه‌ندییانه باشتر بكرێن، هه‌روه‌ها چەند پرسێکی دیکه‌ی جێی بایەخی ھاوبەش، تەوەرێکی تری دیدارەکە بوو.
کۆمێنت (0)
تا ئێستا هیچ کۆمێنتێک نەکراوە.