سه‌رۆكی هه‌رێم و باڵیۆزی ئیتاڵیا هاوڕابوون به‌ دیالۆگ كێشه‌كانی هه‌ولێر و به‌غدا چاره‌سه‌ر بكرێن

سه‌رۆكی هه‌رێمی كوردستان و باڵیۆزی ئیتاڵیا له‌ عێراق هاوڕابوون له‌سه‌ر ئه‌وه‌ی كه‌ كێشه‌كانی نێوان هه‌ولێر و به‌غدا به‌ دیالۆگ و به‌پێی ده‌ستوور چاره‌سه‌ر بكرێن.

ئێوارەی ئەمڕۆ چوارشەم نێچیرڤان بارزانی سەرۆكی هەرێمی كوردستان پێشوازی لە ماوریتزیۆ گرێگانتی باڵیۆزی ئیتاڵیا له‌ عێراق و شاندێكی یاوەری كرد.

لە دیدارێكدا دوایین پێشهاتە ئەمنی و سیاسییەكانی عێراق و ناوچەكە و ڕۆژهەڵاتی ناوەڕاست، پرسی بودجە و كێشەكانی هەولێر ـ بەغدا و دۆخی ناوخۆی هەرێمی كوردستان و چۆنیەتیی چارەسەركردنیان، خرانە بەر باس.

هەردوولا هاوڕابوون لەسەر ئەوەی كێشەكانی هەولێر ـ بەغدا بە ڕێگەی دیالۆگ و بەپێی دەستووری عێراقی فیدراڵ چارەسەر بكرێن، جه‌ختیشیان له‌سه‌ر پێویستی و گرنگیی یەكڕیزیی لایەنە سیاسییەكانی هه‌رێمی کوردستان کرده‌وه‌.

تاوتوێكردنی پەیوەندییەكانی ئیتاڵیا لەگەڵ عێراق و هەرێمی كوردستان و كار و چالاكییەكانی باڵیۆزخانەی ئیتاڵیا بەتایبەت لە بواری شوێنەوارناسیدا و چەند بابەتێكی جێی بایەخی هاوبەش، لایەنێكی دیكەی دیدارەكە بوو.