ئه‌مڕۆ چوارشه‌ممه 4-10-2023 له سه‌نته‌ری ئاڵا ،شاعیری ناسراوی كوردستان "غالب حه‌ساری" حه‌وته‌مین كتێبی شیعری خۆی له ژێرناوی "داستانی سه‌روه‌ت و ئه‌وین، فلیمێك به ڕیتمی گۆرانی " بڵاوده‌كاته‌وه.
ئه‌م كتێبه شیعریه داستانێَكی ئه‌ڤینداری هۆنراوه‌ییه له 10 بڕگه پێكهاتوه له 15 به‌ش 211 چوارین و 51 دێرو 64 نیودێره 27 ئه‌كته‌ره 12 ژن و 15 پیاو له ماوه‌ی 3 و 4 ڕۆژێك زیاتریش له شه‌وان له ساڵی 2022 نوسیومه‌ته‌وه .
له‌سه‌رناوه‌ڕۆكی كتێبه شاعیر غالب حه‌ساری به ماڵپه‌ری كوردستان تیڤی راگه‌یاند" (سه‌روه‌ت و ئه‌وین) له قۆناغی 4ی زانكۆی به‌شی یاسا ده‌ست پێده‌كاو جگه له چه‌ندین شوێن جێگه‌و پێگه‌یتر ئه‌نجام له ڕۆژ وئاهه‌نگی ده‌رچوون به وه‌رچه‌رخانێكی زۆر تایبه‌ت و ده‌گمه‌نی چاوه‌ڕوان نه‌كراو گرنگ و مێژوویی جیاواز كۆتایی پێدێت".
له درێژه‌ی لێدوانه‌كه‌ی دا گوتی" داستانی ( سه‌روه‌ت و ئه‌وین )، چیرۆكێكی خه‌یاڵییه به‌هزرو بۆچوون وهه‌ست وهۆشی خۆم ده‌ربڕیوه‌و ڕێكم خستوه‌باس وخواسی ناواخن وناوه‌ڕۆكی داستانی (سه‌روه‌ت و ئه‌وین) زۆربه‌ی ڕووه كۆمه‌ڵایه‌تی و داب و نه‌ریته زه‌قه‌كان و ڕوی چینایه‌تی كۆمه‌ڵگه‌و ڕۆڵی تێكۆشه‌ران ودڵسۆزان و زانست وزانكۆ وپه‌روه‌رده‌و شكۆی ئافره‌ت وخێزانی شه‌هیدو ڕۆڵی دایك وپاراستنی پیرۆزێكان ئامۆژگاری ونیشتمان په‌روه‌ری وسیاسه‌ت وده‌سه‌ڵات وچاو پۆشیه ناجۆریه‌كان و زۆر ڕویتریشی په‌یوه‌ست به‌م ڕۆی له خۆگرتوه".
له‌باره‌ی هه‌ردوو كاره‌كته‌ری( سه‌روه‌ت و ئه‌وین) شاعیر غالب حه‌ساری ده‌ڵێت" سه‌روه‌ت ، كاراكته‌ری سه‌ره‌كیه كوڕی كه‌سێكی دڵسۆزو نیشتمان په‌روه‌ره باوكی سه‌روه‌ت به هۆی كاری ڕێكخستنی ناوشار ده‌گیرێ و له سێداره ده‌درێ ، له ڕوویه‌كی تره‌وه سه‌روه‌ت هه‌م به‌واتای ماڵ و سامان و زه‌نگینی دێ ، لێره به مه‌به‌ستی هونه‌ری و هزری خۆم سه‌روه‌تی شكۆداریم سه‌ر خستووه، به سه‌ر سه‌روه‌ت و سامانێك كه چڵێسی زۆر پێوه كراوه‌و ده‌كرێ .
ئه‌وین ، كچی پێشمه‌رگه‌یه‌كی تێكۆشه‌ری كوردستانه باوكی له شاخ پێش ڕاپه‌ڕین شه‌هید ده‌بێ ئه‌وین هه‌م به‌واتای ئه‌وینداری ودڵداری وخۆشه‌ویستی دێ كه ئه‌وینی پاك چه‌ندێ به‌رز و پیرۆز و پایه‌دار و شكۆداریه هێمای وره‌و خۆڕاگریه، بۆیه لێره‌ش ڕۆڵی پێگه‌ی ئه‌وینم به‌هێزتر پیشانداوه له ڕۆڵی خاوه‌ن سه‌روه‌ت وسامان و زه‌نگین ، به شانازیه‌وه لێره‌ش ئه‌وینی ڕاسته‌قینه سه‌ری به‌رزی دانانه‌وێ و سه‌رده‌كه‌وێ به‌سه‌ر زه‌نگینی زۆردارو چاوبرسی و چڵێسكاران".
له كۆتاییدا غالب حه‌ساری شاعیر ده‌ڵێت" سه‌روه‌ت و ئه‌وین، فلیمێ به ڕیتمی گۆرانی، پێشكه‌شه به گیانی پاك و به‌رزه‌فڕی ئیمبپراتۆرو شكۆی شاعیران ڕه‌وانشاد ( ئه‌حمه‌دی خانی)، خوازیام هه‌ركاتێ هه‌ر ده‌رهێنه‌رێ ئه‌م به‌رهه‌مه‌ی لا په‌سند بوو مه‌به‌ستی بێ بیكات به فلیم (مه‌رجه به ڕیتمی گۆرانی بێ و ئاوازی جیاواز بۆ ئه‌دای ئه‌كته‌ره‌كان هه‌ڵبژێرێ ) بۆیه وه‌ك مانشێتێك و سونبولێك له لاپه‌ڕه‌كان نوسراوه، هیوادارم توانیبێتن خزمه‌تێكی بچووكم به فه‌رهه‌نگ و وێژه‌ی زمانی كوردی".
شایانی باسه ئه‌ك كتێبه،به سوپاسه‌وه به سپۆنسه‌ری ڕێزدار د، كه‌ماڵ كه‌ركووكی، به‌رپرسی مه‌كته‌بی ڕێكخستنی كه‌ركووك گه‌رمیان ئه‌ندامی م، س پ، د، ك، چاپكراوه.
شاعیر" غالب حه‌ساری" تائێستا حه‌وت كتێبی شیعری به‌چاپ گه‌یاندوه ،(40) كتێبی هۆنراوه‌ی چاپ نه‌كراوی هه‌یه، له‌ناویان (15)كتێبی داهێنانی شیعرییه، تائێستا 40 له هۆنراوه‌كانی له‌لایه‌ن گۆرانیبێژانه‌وه كراون به سروود.
به‌رهه‌می چاپكراوه‌كانی شاعیر:
1 بژی پارتی و بارزانی ساڵی 2013
2 كوردستانێكی گه‌شتر ساڵی 2014
3 سڵاو له پێشمه‌رگه ساڵی 2015
4 هه‌ر بژی كوردستانم ساڵی 2016
5 لووتكه‌ی داهێنان ، ، یه‌ك چوارین به 212 جار ده‌خوێندرێته‌وه ،، ساڵی 2017
6 كوردستانی ماد ساڵی 2023
7 سه‌روه‌ت و ئه‌وین ساڵی 2023
شایانی باسه ،كۆڕه‌كه له كاتژمێر 5ی ئێواره به‌رێوه ده‌چێت، له‌لایه‌ن شاعیر (قه‌هار شێخانی) خوێندنه‌وه‌ی بۆ ده‌كرێت.
کۆمێنت (0)
تا ئێستا هیچ کۆمێنتێک نەکراوە.